ऊर्जा खबर
काठमाडौं । निजी लगानीमा निर्माण हुने करिब ५ सय मेगावाटका सौर्य विद्युत आयोजनाको अध्ययन भइरहेको छ । विभिन्न ३२ कम्पनीले विद्युत विकास विभागबाट अनुमतिपत्र लिएर यी सौर्य विद्युत आयोजनाको अध्ययन गरिरहेका हुन् ।
अहिले अनुमतिपत्र जारी भएका निजी लगानीमा निर्माण हुने १ मेगावाटदेखि १ सय २० मेगावाटसम्मका आयोजनाको अध्ययन भइरहेको विभागले जनाएको छ । विभागका अनुसार सबैभन्दा ठुलो १ सय २० मेगावाटको सौर्य विद्युत आयोजना चौधरी ग्रुपले अघि बढाएको छ ।
चौधरी ग्रुपले सिजी इनर्जी इन्फ्राइस्ट्रक्चर कम्पनीमार्फत प्रदेश–२ को महोत्तरीमा संरचना रहने गरी यो आयोजनाको अध्ययन गरिरहेको छ । सिजीले आयोजना निर्माण गर्न २०७५ पुस १५ गते विभागबाट अध्ययन अनुमतिपत्र लिएको थियो ।
यही कम्पनीले पर्सामा ८० मेगावाटका २ सौर्य विद्युत आयोजनाको पनि अध्ययन गरिरहेको छ । सिजीले पर्सामा ५० मेगावाट र ३० मेगावाटको आयोजना निर्माण गर्दैछ ।
यस्तै, पानस इनर्जी कम्पनीले सिराहामा १ सय मेगावाटको आयोजनाको अध्ययन गरिरहेको छ । कम्पनीले लामाडाँडा लामपुर सौर्य विद्युत आयोजनाको अध्ययन गरिरहेको हो । कम्पनीले गत कात्तिक २० गते मात्रै विभागबाट यो आयोजनाको अध्ययन अनुमतिपत्र लिएको थियो ।
यसैगरी, सोलार एग्रीकल्चर फार्मरसले सुर्खेतमा २० मेगावाटको सौर्य विद्युत आयोजनाको अध्ययन गरिरहेको छ । २०७६ साउन १२ मा आयोजना निर्माण गर्न अनुमति दिएको थियो । १० मेगावाटका अन्य ७ आयोजनाले पनि अनुमितपत्र दिएर अध्ययन गरिरहेका छन् ।
चालू आर्थिक वर्षको पुस मसान्तसम्ममा ४ कम्पनीले १ सय २७ मेगावाट सौर्य विद्युत आयोजनाको अध्ययन अनुमतिपत्रका लागि आवेदन दिएको विभागले जनाएको छ । १ सय मेगावाटको सौर्य विद्युत आयोजना अघि बढाउन मिथिला इनर्जी प्रालिले अनुमतिपत्रका लागि आवेदन दिएको छ ।
श्रेयान्सी ऊर्जा र सनलाइट इनर्जी प्रालिले १०/१० मेगावाटका आयोजनाका लागि आवेदन दिएका छन् । तराई सोलार प्रालीले पनि ७.७ मेगावाटको आयोजना अघि बढाउन अनुमतिपत्र मागेको छ ।
यसअघि अनुमतिपत्र जारी भएकामध्ये साढे ८ मेगावाटको बुटवल सौर्य विद्युत आयोजना सम्पन्न भई राष्ट्रिय प्रसारण प्रणालीमा जोडिइसकेको छ । रिडी हाइड्रो पावर कम्पनीले यो सौर्य विद्युत आयोजना निर्माण गरी सञ्चालनमा ल्याएको हो । यो आयोजनाले गत असोजदेखि विद्युत उत्पादन गरिरहेको छ ।
