ऊर्जा खबर
काठमाडौं । देशको विभिन्न जिल्लामा पहिचान भएका ५२५.५ मेगावाटका जलविद्युत आयोजनाको अध्ययन पुरा भएको छ । निजी तथा सरकारी निकायले पहिचान गरेको १० जलविद्युत आयोजनाको अध्ययन सकिएको हो । यी आयोजनाले उत्पादन अनुमतिका लागि विद्युत विकास विभाग आवेदन दिएका छन् ।
विभागका अनुसार कात्तिकमा ३२५.३१ मेगावाटका ५ र मंसिरमा २००.१९ मेगावाटका ५ गरी जम्मा १० जलविद्युत आयोजनाले उत्पादन अनुमतिका लागि विभागमा आवेदन दिएका छन् । सरकारी तथा निजी ऊर्जा उत्पादकले अध्ययन पुरा गरी उत्पादन अनुमतिका लागि आवेदन दिएका हुन् ।
आवेदन दिएकामध्ये सबैभन्दा ठुलो १ सय ५९ मेगावाटको मुग कर्णाली जलविद्युत आयोजना रहेको छ । यो आयोजनाको बुटवल पावर कम्पनी लिमिटेडले अध्ययन पुरा गरेर उत्पादन अनुमतिका लागि २०७९ मंसिर २ गते आवेदन दिएको छ ।
यस्तै, १ सय ५० मेगावाटको बेग्नास–रुपा स्टोरेज जलविद्युत आयोजनाले पनि २०७९ कात्तिक २० गते आवेदन दिएको छ । यो आयोजनाको नेपाल विद्युत प्राधिकरणले अध्ययन पुरा गरेको थियो ।
साथै, सुर्य इनर्जी प्रालिले अध्ययन पुरा गरेको ९१.१५० मेगावाटको बुढी गण्डकी नदीले २०७९ कात्तिक ६ गते र किरन पावर कम्पनी लिमिटेडले अध्ययन पुरा गरेको ९.८ मेगावाटको निमरुङ खोलाले २०७९ कात्तिक ६ गते आवेदन पेस गरेकाे विभागले जनाएकाे छ ।
लालुपाते हाइड्रो पावर कम्पनीले ४९.९५० मेगावाटको धन खोला, दोर्दी खोला जलविद्युत कम्पनी लिमिटेडले २४.४१० मेगावाटको सुपर इन्खु खोला जलविद्युत आयोजना निर्माण अघि बढाउन आवेदन दिएका छन् । यी कम्पनीले त्रमश कात्तिक २३ गते र २८ गते आवेदन दिएका हुन् ।
यस्तै, २४.२२० मेगावाटको माथिल्लो इन्खु खोला जलविद्युत आयोजना निर्माण गर्न युनिभर्सल पावर कम्पनी लिमिटेडले २०७९ मंसिर १ गते आवेदन दिएकाे छ । ७.२५० मेगावाटको श्याम खोला आयोजना श्याम खोला डेभलपमेन्ट कम्पनी लिमिटेडले र ४.६ मेगावाटको माछा खोलाको बुढीगण्डकी हाइड्रो पावरले निर्माण अनुमतिका लागि आवेदन दिएको विभागको तथ्याङमा उल्लेख छ ।
