ऊर्जा खबर
काठमाडौं । बुटवल पावर कम्पनी (बिपिसी) को सहायक न्यादी हाइड्रोपावर कम्पनीको सेयर आवेदन दिने आज अन्तिम दिन हो । गत भदौ १ गतेदेखि खुल्ला गरेको सेयर आवेदन अवधि आज साँझ ५ बजेबाट सकिन लागेको हो ।
कम्पनीले लमजुङमा निर्माणाधीन ३० मेगावाटको न्यादी खोला जलविद्युत आयोजनाको स्थानीयका लागि छुट्याएको सय रुपैयाँमा अंकित १८ करोड रुपैयाँ बराबरको १८ लाख कित्ता सेयर निष्कासन गरेको हो । पहिलो चरणमा स्थानीयका लागि छुटयाएको सेयर निष्कासन गरी बाँडफाँड गरिनेछ ।
निष्कासन भएका सेयरमध्ये अति प्रभावित क्षेत्र लमजुङ जिल्लाको मर्स्याङ्दी गाउँपालिका वडा नम्बर ३, ६, ७ र ८ का स्थानीयका लागि ५ लाख कित्ता र उक्त क्षेत्रबाहेक जिल्लाको अन्य क्षेत्रमा बस्ने स्थानीयका लागि १० लाख कित्ता सेयर छुट्याएको छ । बाँकी ३ लाख कित्ता संस्थापक सेयरधनी संस्थाहरु बुटवल पावर कम्पनी र लमजुङ विद्युत विकास कम्पनीका कर्मचारीहरुका लागि छुट्याइएको छ ।
स्थानीयले न्युनतम १० कित्तादेखि अधिकतम ५० हजार कित्तासम्मका लागि आवेदन दिन पाउनेछ । आयोजना प्रभावित स्थानीयले ग्लोबल आइएमई बैंकको लमजुङ जिल्लाभर रहेका शाखा, सिभिल बैंकको भुलभुले शाखा र एनएमबि बैंकको बेशीसहर शाखाबाट आवेदन दिन सक्नेछन् । यस्तै, संस्थापक सेयरधनी संस्थाका कर्मचारीले न्यादी हाइड्रोपावरको कार्यालयबाट आवेदन दिन सक्नेछन् ।
स्थानीयको सेयर निष्कासन गरी बाँडफाँड पूरा भएपछि दोस्रो चरणमा सर्वसाधारणका लागि छुट्याएको सेयर निष्कासन गरी बाँडफाँड गरिनेछ । यो कम्पनीले सेयर निष्कासन गरी बाँडफाँड गर्न ग्लोबल आइएमई क्यापिटललाई बिक्री प्रबन्धक चयन गरेको छ ।
कम्पनीले सेयर निष्कासन गरी बाँडफाँड गर्न नेपाल धितोपत्र बोर्डबाट गत ११ गत अनुमति पाएको थियो । कम्पनीको निर्माणाधीन आयोजनाको काम अन्तिम चरणमा पुगेको छ ।
