ऊर्जा खबर
काठमाडौं । ग्रीन भेन्चर कम्पनीले ६२ लाख ५० हजार कित्ता साधारण सेयर निष्कासन गर्ने भएको छ । कम्पनीले रामेछापमा निर्माणाधीन ५२.४ मेगावाटकको लिुख-४ जलविद्युत आयोजना प्रभावित स्थानीय र सर्वसाधारणका लागि छुट्याएको सेयर निष्कासन गर्न लागेको हो ।
प्रतिकित्ता सय रुपैयाँमा अंकित ६२ करोड ५० लाख रुपैंया बराबरको साधारण सेयर निष्कासन अनुमतिका लागि नेपाल धितोपत्र बोर्डमा आवेदन पेश गरेकाे कम्पनीले जनाएको छ । कम्पनीका अनुसार बोर्डबाट अनुमति पाए लगत्तै साधारण सेयर निष्कासन गरी बाँडफाँड गरिनेछ ।
कम्पनीकाे सेयर निष्कासन गरी बाँडफाँड गर्न लक्ष्मी क्यापिटललाई बिक्री प्रबन्धक तोकिएको छ । कम्पनीले रामेछापको लिखु तामाकोसी गाउँपालिकास्थित लिखु खोलामा निर्माण गरीरहेको आयोजनाको ८० प्रतिशत बढी काम सकिएको छ । अबकाे ३ देखि ४ महिनामा आयोजनाबाट विद्युत उत्पादन गर्ने लक्ष्य छ ।
आयोजना सम्पन्न गर्न ९ अर्ब ५४ करोड रुपैयाँ रुपैयाँ लागत अनुमान गरिएको छ । कुल लागतको ७५ प्रतिशत नबिल बैंकको अगुवाईमा ७ बैंकले ऋण लगानी गरेका छन् । बाँकी २५ प्रतिशत स्वपुजी लगानी छ ।
बलेफी हाइड्रोले पनि ३६ लाख ५५ हजार कित्ता सेयर निष्कासन गर्ने
बलेफी हाइड्रो पावर कम्पनी लिमिटेडले ३६ करोड ५५ लाख ९४ हजार रुपैयाँ बराबरको ३६ लाख ५५ हजार ९ सय ४० कित्ता साधारण सेयर निष्कासन गर्ने भएको छ । कम्पनीले सिन्धुपाल्चाेकमा निर्माणाधीन ३६ मेगावाटको अप्पर बलेफी ‘ए’ जलविद्युत आयोजना प्रभावित स्थानीय र सर्वसाधारणका लागि छुट्याएको साधारण सेयर निष्कासन गर्न लागेको हो ।
सेयर निष्कासन अनुमतिका लागि बोर्डमा आवेदन दिएको कम्पनीले जनाएको छ । बोर्डबाट स्वीकृति पाएपछि सेयर निष्कासन गरी बाँडफाँड गर्ने कम्पनीकाे तयारी छ । सेयर निष्कासन गरी बाँडफाँड गर्न ग्लोबल आइएमई क्यापिटललाई बिक्री प्रबन्धक तोकिएको छ ।
कम्पनीले निर्माण गरिरहेकाे आयोजना अन्तिम चरणमा पुगेकाे छ । याे आयोजनाबाट चालू आर्थिक वर्षभित्र विद्युत उत्पादन सुरु गर्ने तालिका छ ।आयोजनाले उत्पादन गर्ने विद्युत लामाेसाँघु सबस्टेसनमा जाेडिनेछ ।
३० प्रतिशत स्वपुँजी र ७० प्रतिशत ऋण लगानी रहने आयोजना सम्पन्न गर्न ७ अर्ब रुपैयाँ खर्च हुने अनुमान छ । आयोजनामा ५ बैंकको ऋण लगानी छ ।
