ऊर्जा खबर
काठमाडौं । संस्थागत सुशासन, पारदर्शिता, जवाफदेहिता जस्ता पक्षलाई आत्मसात गर्दै निजी जलविद्युत क्षेत्रमा काम गरिरहेको नेपाल हाइड्रो पावर कम्पनी लिमिटेडले ४२ मेगावाटको आंशिकजलाशय (पि–आरओआर) जलविद्युत् आयोजना निर्माण गर्ने भएको छ ।
ओखलढुंगा र रामेछापको सीमा भएर बग्ने लिखु खोलामा पहिचान भएको उक्त आयोजना निर्माण गर्न लागि निर्माणपूर्वका काम भइरहेका छन् । अहिलेसम्म विस्तृत आयोजना प्रतिवेदन (डिपिआर) तयारीको काम सुरु भइसकेको हुँदा यसलाई समयमै टुंग्याएर निर्माणमा जाने कम्पनीका कार्यकारी अध्यक्ष कुमार पाण्डेले बताए ।
‘विद्युत विकास विभागबाट अध्ययन अनुमतिपत्र प्राप्त भएको ५ महिनापछि नै हामीले काम सुरु गरेका छौं,’ उनले मंगलबार ऊर्जा खबरसँग भने, ‘अध्ययन सकिएको ३ वर्षपछि निर्माण सुरु गर्ने गरी डिपिआरलाई तीव्रता दिइएको छ ।’ डिपिआरपछि उत्पादन अनुमतिपत्र लिने र नेपाल विद्युत प्राधिकरणसँग विद्युत खरिद सम्झौता (पिपिए) गर्ने कम्पनीको योजना छ ।
निर्माण सुरु भएको ४ वर्षभित्र आयोजनाको सबै काम पूरा गरी विद्युत उत्पादन गर्ने लक्ष्य रहेको पाण्डेले जानकारी दिए । उनका अनुसार आयोजनाको प्रारम्भिक लागत ९ अर्ब रुपैयाँ अनुमान गरिएको छ; जसमध्ये ७० प्रतिशत ऋण र ३० प्रतिशत स्वपुँजी लगानी रहने जनाइएको छ ।
सिन्धुपाल्चोकमा ७.५ मेगावाटको इन्द्रावती–३ निर्माण गरी सञ्चालन गरिरहेको कम्पनीले हाल भोजपुरमा सहायक कम्पनीमार्फत १४.१५ मेगावाटको तल्लो इर्खुवा खोला र ४.५ मेगावाटको तल्लो इन्द्रवती निर्माण गरिरहेको छ ।
