कुलेखानी जलाशयमा पानीकाे सतह रित्तिँदै, अब ६ मिटर मात्रै चलाउन सकिने

काठमाडौं । कुलेखानी जलविद्युत आयोजनाको जलाशयमा पानीको सतह १५०६.०२ मिटरमा आइपुगेको छ । गत बर्खामा पुरै भरिएको जलाशयको पानीको सतह २३.९८ मिटर घटेर यहाँसम्म आइपुगेको हो ।

यो वर्ष सुख्खायाममा विद्युतको माग व्यवस्थापन गर्न केही महिना २४ घन्टा चलाउनु परेकाले जलाशयको धेरै पानी खपत भइसकेको छ । अहिले भने जलाशय चलाउन कम गरिएको नेपाल विद्युत प्राधिकरण उत्पादन निर्देशनालय अन्तर्गतकाे ठूला उत्पादन सञ्चालन तथा संभार विभाग प्रमुख रामकुमार यादवले बताए ।

‘सुख्खा याममा यो वर्ष नदी प्रवाही जलविद्युतगृहको उत्पादन धेरै कम भयो । यस्तो अवस्थामा माग र आपूर्ति व्यवस्थापन गर्न कुलेखानी जलाशयमा निर्भर हुनुपर्यो,’ उनले ऊर्जा खबरसँग भने, ‘तर, अहिले आवश्यकताअनुसार थोरै समय जलाशय चलिरहेको छ ।’

यो वर्ष विद्युतको माग धेरै बढेकाले पनि आपूर्ति व्यवस्थापनको भार कुलेखानी जलाशयलाई थपिएको हो । जाडो बढेका बेला यो वर्ष विद्युतको उच्च माग १४ सय ८० मेगावाटसम्म पुगेको थियो । यही समयमा कुलेखानी जलाशय बढी चलेको थियो । नदी प्रवाही जलविद्युतगृहले जडित क्षमताभन्दा कम विद्युत उत्पादन गरेकाले पनि कुलेखानीमा बढी चाप पर्याे ।

उनले अब जलाशयमा उपयोग गर्न मिल्ने ६ मिटर पानीमात्रै बाँकी रहेको बताए । बर्खा सुरु नहुन्जेल जलाशयमा पानी थपिने सम्भावना नरहेकाले कुनै जलविद्युतगृहमा समस्या आउँदा तथा वीरगन्ज क्षेत्रका उद्योगमा साँझको समयमा आउनसक्ने भोल्टेजको समस्या समाधानका लागि मात्रै जलाशय आयोजना चलाउने गरिएको उनले बताए ।

जलाशयको पानी उपयोग गरी ६० मेगावाटको कुलेखानी–१ र ३२ मेगावाटको कुलेखानी–२ र १४ मेगावाटके कुलेखानी तेस्रे गरी ३ जलविद्युत केन्द्रबाट १ सय ६ मेगावाट विद्युत उत्पादन गरिन्छ । देशको विद्युत माग र आपूर्तिको सन्तुलन मिलाउने कुलेखानी एकमात्र जलाशय आयोजना हो ।  जलाशयको क्षमता १५ सय ३० मिटर छ ।