ऊर्जा खबर
काठमाडौं । म्याग्दीमा ४२ मेगावाटको मिस्त्री खोला जलविद्युत आयोजना निर्माण गरी सञ्चालनमा ल्याएको माउन्टेन इनर्जी नेपाल लिमिटेडले १२ मेगावाटको मिस्त्री खोला–२ जलविद्युत आयोजना निर्माण गर्ने भएको छ । कम्पनीले मिस्त्री खोलाको विद्युतगृहबाट निस्केको पानी प्रयोग गरी क्यासकेड आयोजना निर्माण गर्न लागेको हो ।
अध्ययन पूरा भएको आयोजनाको उत्पादन अनुमतिपत्र लिने प्रक्रिया अन्तिम चरणमा पुगेको छ । विद्युत विकास विभागले कम्पनीलाई उत्पादन अनुमति दिन ३५ दिने सूचना जारी गरेको छ ।
विभागका अनुसार वन तथा वातावरण मन्त्रालयबाट स्वीकृत वातावरणीय प्रभाव मूल्यांकन प्रतिवेदन र आयोजनाको अध्ययन रिपोर्टका आधारमा प्रवर्द्धक कम्पनीलाई उत्पादन अनुमतिपत्र दिने तयारी भइरहेको छ ।
विभागले अनुमतिपत्र जारी गर्नुअघि आयोजना निर्माण तथा सञ्चालन गर्दा पर्न सक्ने प्रतिकुल असरका बारेमा सम्बन्धित सरोकारवालासँग राय/सुझाव मागेको छ । विभागले सूचना जारी भएको मितिले ३५ दिनभित्र प्राप्त हुने गरी राय/सुझाव पठाउन सरोकारवाला समक्ष आग्रह गरेको छ ।
आयोजनाको मुख्य संरचनाहरूमा बाँध र विद्युतगृह कालिगण्डकी नदीको बायाँ किनारमा निर्माण हुने गरी डिजाइन तयार पारिएको छ । आयोजनाको बाँधबाट ११६५.१५ मिटर लामो हेडरेस कल्भट हुँदै १३३०.३० मिटर लामो सुरुङ र १५४ मिटर लामो पेनस्टक पाइपमार्फत पानीलाई विद्युतगृहमा पुर्याइनेछ ।
विद्युतगृहमा जडान भएको जेनेरेटरमार्फत विद्युत उत्पादन गरिनेछ । आयोजनाको काम २०८३ असारभित्र सम्पन्न गरी उत्पादन सुरु गर्ने लक्ष्य छ । यो आयोजनाबाट ६७.५२ गिगावाट घन्टा विद्युत उत्पादन हुनेछ । उत्पादीत विद्युत १३२ केभी सिंगल सर्किट प्रसारण लाइन मार्फत ३ किलोमिटर दुरीमा रहेको मिस्त्री खोला जलविद्युत आयोजनाको स्विचयार्डमा पुर्याई १३२ केभी डबल सर्किट लाइन मार्फत नेपाल विद्युत प्राधिकरणको दाना सबस्टेसनमा जोडिनेछ ।
