ऊर्जा खबर
काठमाडौँ । ऊर्जा, जलस्रोत तथा सिँचाइमन्त्री दीपक खड्काले किसानलाई सहज हुनेगरी सिँचाइका आयोजना अघि बढाउनुपर्नेमा जोड दिएका छन् ।
नवीनतम यान्त्रिक सिँचाइ आयोजनासँग साेमबार मन्त्रालयमा भएको छलफलमा मन्त्री खड्काले नयाँ आयोजना निर्माण गर्दा किसानलाई कसरी सहुलियत प्रदान गर्न सकिन्छ त्यसबारे सोच्नुपर्ने बताए ।
‘छिमेकी मुलुकले कसरी किसानलाई सिँचाइमा सहुलियत प्रदान गरेका छन्, त्यसलाई अध्ययन गरेर नयाँ आयोजनालाई अगाडि बढाउनुपर्छ’, उनले भने । मन्त्री खड्काले आयोजना अगाडि बढाउन आवश्यक पर्ने लागतबारे अर्थ मन्त्रालयसँग छलफल गर्ने प्रतिबद्धता जनाए ।
सुरुमा सर्लाही र रौतहट जिल्लाको १६ स्थानीय तहका २२ हजार ४०० हेक्टर क्षेत्रफलमा सिँचाइ सुविधा पुर्याउने उद्देश्यले आयोजना अघि बढाइएको आयोजनाका प्रमुख अजयराज अधिकारीले जानकारी दिए ।
‘डिप ट्युबेल’ र ‘प्रिपेड कार्ड’मार्फत किसानको खेतमा सिँचाइ सुविधा लैजाने उद्देश्यले आयोजनालाई अगाडि बढाइएको जनाउँदै उक्त आयोजना ४ वर्षभित्र सम्पन्न गरिसक्ने लक्ष्य राखिएको उनले बताए ।
आयोजना सम्पन्न भए किसानले सिँचाइका लागि १ हजार लिटर पानी ३ रूपैयाँमा उपभोग गर्न पाउनेछन् । आयोजनाका लागि ७८ प्रतिशत एसियाली विकास बैंक र २२ प्रतिशत नेपाल सरकारले लगानी रहेको छ ।
