ऊर्जा खबर
काठमाडौं । सरकारले वैकल्पिक ऊर्जा प्रवर्द्धनका लागि २ अर्ब ७६ करोड रुपैयाँ बजेट विनियोजन गरेको छ । अर्थमन्त्री विष्णु पौडेलले शनिबार आर्थिक वर्ष २०७८/७९ को बजेट सार्वजनिक गर्दै वैकल्पिक ऊर्जाको प्रवर्द्धनका लागि बजेट विनियोजनको घोषणा गरेका हुन् ।
याे बजेट ऊर्जा प्रवर्द्धन केन्द्रमार्फत कार्यान्वयन हुनेछ । वैकल्पिक वैकल्पिक ऊर्जाको प्रवर्द्धनका लागि विनियोजन गरिएको बजेटमार्फत राष्ट्रिय प्रसारण प्रणालीको विद्युत सेवा नपुगेका ५० हजार घरधुरीमा लघु तथा साना जलविद्युत, सौर्य र वायु ऊर्जाका स्रोतबाट विद्युत पुर्याउने पौडेलले बताए ।
स्थानीय तहका साथै सामुदायिक संस्थाले सौर्य तथा लघु जलविद्युत आयोजनाबाट विद्युत उत्पादन एवं वितरण गरेमा कूल लागतको ९० प्रतिशतसम्म अनुदान दिइने घोषणा बजेटले गरेको छ ।
निजी क्षेत्रले उत्पादन गर्ने सौर्य विद्युत नेपाल विद्युत प्राधिकरणले खरिद गर्ने र सौर्य विद्युत आयोजनाको स्वीचयार्डसम्म प्रसारण लाइन विस्तारको व्यवस्था मिलाइने पनि अर्थमन्त्री पौडेलको बजेट भाषणमा भनिएको छ ।
यसबाट विद्युत पहुँच नपुगेका २ सय ५० स्थानीय तहमा सौर्य ऊर्जाबाट ३ सय ७५ मेगावाट विद्युत उत्पादन गर्न सकिने बजेटमा उल्लेख गरिएको छ । स्थानीय क्षेत्रको विद्युतकरणका लागि निर्माण हुने सौर्य ऊर्जा प्रविधि जडान गर्दाको लागत रकम सम्बन्धित स्थानीय तहमा पठाइने भनिएको छ ।
यस्तै, ठूला वायोग्यास प्लान्ट निर्माण गरी ग्यास तथा प्रांगारिक मल उत्पादन गर्न सम्बन्धित स्थानीय तहलाई वित्तीय अनुदान दिने व्यवस्था पनि बजेटमा गरिएको छ ।
.jpg)
