ऊर्जा खबर
काठमाडौं । सरकारले आगामी आर्थिक वर्षभित्र विद्युत जडित क्षमता ३६०० मेगावाट पुर्याइने घोषणा गरेको छ । अर्थ मन्त्री डा. प्रकाशशरण महतले आज संसदको दुवै सदनमा आव २०८०/८१ को बजेट प्रस्तुत गर्दै यस्तो घोषणा गरेका हुन् ।
आगामी आवमा १११ मेगावाटको रसुवागढी, ४२.५ मेगावाटको सान्जेन तथा निजी क्षेत्रबाट उत्पादित विद्युत समेत गरी उक्त परिमाण पुर्याइने घोषणा गरिएको छ । आगामी आवभित्र देशका सबै क्षेत्रमा विद्युतीकरण गर्न सोलार, लघुजलविद्युत, वायु लगायत नवीकरण ऊर्जाको विकास गरिने घोषणा गरिएको छ ।
आयातित ऊर्जालाई प्रतिस्थापन गरी प्रतिव्यक्ति विद्युत खपत ४५० किलोघन्टा पुर्याइने बजेटमा उल्लेख छ । यस्तै, आगामी आवमा ९०० मेगावाट विद्युत थप हुने प्रक्षेपण गरिएको छ । सरकारले ऊर्जा क्षेत्रमा विनियोजन गरेको बजेट चालू आवको भन्दा २१ अर्ब रुपैयाँले कम हो ।
अर्थ मन्त्री महतले सम्पन्न हुने खालका रणनीतिक आयोजनालाई मात्रै बजेट व्यवस्थापन गरेपछि भौतिक पूर्वाधार र ऊर्जा जस्ता विकासे मन्त्रालयको बजेट कटौती भएको छ । चालू आवका लागि ऊर्जातर्फ ७५ अर्ब १० करोड रुपैयाँ र जलस्रोत तथा सिचाइतर्फ ३३ अर्ब ५० करोड रुपैयाँ विनयोजन गरिएको थियो।
