ऊर्जा खबर
काठमाडौँ । बाढीले बगाएको खिम्ती–लामोसाँघु १३२ केभी प्रसारण लाइनको टावरलाई आपत्कालीन पुनस्थापना प्रणाली (इमर्जेन्सी रिस्टोरेशन सिस्टम– ईआरएस) टावर प्रयोग गरी लाइन सञ्चालनमा ल्याइएको छ । गत असोज १२ र १३ गतेकाे अविरल वर्षाका कारण तामाकोशी नदीमा आएको बाढीले बगाएकाे उक्त प्रसारण लाइन आज (कार्तिक ९) गतेबाट सञ्चालनमा ल्याइएको हो ।
बाढीले रामेछापको मन्थली नगरपालिका–१३ देवीटारस्थित खिम्ती–लामोसाँघु प्रसारण लाइनको ७ नम्बर टावर बगाएको थियो । टावर बगेपछि ४ वटा टावरको तार (कन्डक्टर) मा पनि क्षति पुगेको थियो । टावर बगाएपछि उक्त लाइन असोज १३ बाट बन्द भएकाे थियाे । यसले खिम्तीबाट आउने काठमाडौँ उपत्यकाको प्रसारण लाइन लिङ्क टुटेको थियाे । नेपाल विद्युत् प्राधिकरणले आफैँसँग रहेको ईआरएस संरचनाको प्रयोग गरी खिम्ती–लामोसाँघु १३२ केभी प्रसारण लाइन सञ्चालनमा ल्याएको हो ।
ईआरएस टावर राख्न लागेपछि स्थानीयले क्षतिपूर्तिको माग गर्दै काममा अवरोध गरेका थिए । तर ऊर्जा, जलस्रोत तथा सिँचाइ राज्यमन्त्री पूर्ण बहादुर तामाङ, रामेछापका प्रमुख जिल्ला अधिकारीलगायतको उपस्थितिमा भएको छलफलमा स्थानीयसँग सहमति जुटेपछि २ कात्तिकबाट ईआरएस टावर जडान शुरू गरिएको थियो ।
निर्माण क्षेत्रकाे अनुभवी मानिने कम्पनी मुढभरी एन्ड जोशी कन्स्ट्रक्सनले ईआरएस टावरकाे जडान कार्य गरेको प्राधिकरणले जनाएकाे छ ।
