ऊर्जा खबर
काठमाडौं । मिलेनियम च्यालेञ्च एकाउन्ट, नेपाल (एमसिए–नेपाल) ले विद्युत प्रसारण लाइन निर्माण सुरु गर्न ठेक्का आह्वान गरेको छ । अमेरिकी वैदेशिक सहायता एजेन्सी मिलेनियम च्यालेन्ज कर्पोरेशन (एमसीसी) बाट प्राप्त हुने अनुदान र सरकारको लगानीमा ३१५ किलोमिटर लाइन निर्माण अघि बढाउन ठेक्का आह्वान गरेको हो ।
एमसीसीले सोमबार लाइन निर्माणका लागि ठेक्का निकालेर परियोजनाको काम तीन लटमा अघि बढाउन लागेको हो । पहिलो लटमा लप्सीफेदी–रातमाटे–न्यु हेटौंडा (११७ किलोमिटर), दोस्रो लटमा रातमाटे–न्यु दमौली (९० किलोमिटर) र तेस्रो लटमा न्यु दमौली–न्यु बुटवल र न्यु बुटवलबाट भारतीय सीमासम्म (१०८ किलोमिटर) गरी तीन लटमा कुल ३१५ किलोमिटर लाइन निर्माण गर्न ठेक्का आह्वान गरेको एमसीसीले जनाएको छ ।
उत्तर पूर्वी काठमाडौंको लप्सीफेदीदेखि नुवाकोटको रातमाटे हुँदै मकवानपुरको हेटौंडासम्म (लफ्सीफेदी–रातमाटे–न्यू हेटौंडा) प्रसारण लाइनको पहिलो लट निर्माण हुनेछ । रातमाटेदेखि तनहुँको दमौलीसम्म (रातमाटे–दमौली) दोस्रो लटमा निर्माण हुनेछन् ।
दमौलीदेखि बुटवलसम्म (दमौली–बुटवल) र बुटवलदेखि भारतको उत्तर प्रदेशस्थित गोरखपुरसम्म (बुटवल–गोरखपुर) अन्तरदेशीय प्रसारण लाइन तेस्रो लटमा निर्माण हुनेछ । प्रसारण लाइनको एउटा खण्ड नेपालको बुटवलदेखि भारतको गोरखपुरसम्म पुग्नेछ ।
इच्छुक कम्पनीले २७ मार्च (२०७९ चैत १३ गते) सम्म आवेदन दिन सक्नेछन् । यो ठेक्का पाउने कम्पनीले डिजाइन, सप्लाई, डेलिभरी, इन्स्टलेसन, टेष्टिङ, कमिसनिङ गर्नु पर्नेछ । आयोजनाको सम्भाव्यता अध्ययन प्रतिवेदन भने एमसीसी–नेपालले उपलब्ध गराउनेछ ।
लाइन निर्माणको काम ठेक्का सम्झौता भएको ५ वर्षमा पूरा गर्नुपर्नेछ । सन् २०२३ को अगष्ट (२०८० भदौ) बाट निर्माण सुरु गर्ने कार्यतालिका रहेको परियोजनाका सबै काम २०२८ अगष्ट (२०८५ भदौ) भित्र सम्पन्न गर्नुपर्नेछ ।
प्रस्तावित आयोजनामा कुल ८५६ वटा टावर निर्माण हुनेछन् । टावर निर्माणका क्रममा २ लाख १२ हजार रुखहरू काट्नुपर्छ । सरकारी र निजी गरी ८०० रोपनी जग्गा चाहिने अनुमान गरिएको छ । अहिले रुख कटानको स्वीकृति र अधिग्रहणको प्रक्रिया अघि बढेको छ ।
काठमाडौं–सिन्धुपाल्चोक–नुवाकोट–धादिङ–मकवानपुर–चितवन–तनहुँ– पाल्पा–नवलपुर–परासी हुँदै जाने यो लाइनमा ३००० मेगावाटसम्म विद्युत प्रवाह गर्न सकिनेछ ।
