ऊर्जा खबर
काठमाडौं । जगदुल्ला हाइड्रो पावर कम्पनी लिमिटेडले १०६ मेगावाटको जगदुल्ला आंशिक जलाशाय जलविद्युत् आयोजना निर्माणको काम ६ वर्षमा सम्पन्न गर्ने लक्ष्य राखेको छ । कर्णाली प्रदेश डोल्पा जिल्लाको जगदुल्ला गाउँपाालिका र मड्केचुला गाउँपालिकामा पहिचान भएको आयोजनाको निर्माण २०८६ भित्र सम्पन्न गर्ने लक्ष्य राखेको हो ।
विद्युत् विकास विभागले आयोजनाको उत्पादन अनुमति दिने प्रक्रिया अन्तिम चरणमा पुर्याएको छ । विभागले कम्पनीको नाममा उत्पादन अनुमति जारी गर्न ३५ दिने सूचना प्रकाशन गरेको छ । विभागले यो आयोजना निर्माण तथा सञ्चालन गर्दा पर्न सक्ने प्रतिकुल असरबारे राय/सुझाव माग गरेको छ । इच्छुकले ३५ दिनभित्र राय पठाउनु पर्नेछ ।
आयोजना बनाउन २४ अर्ब १७ करोड ४८ लाख ९२ हजार रुपैयाँ लागत अनुमान गरिएको छ । आयोजनामा नेपाल इन्फ्रास्ट्रक्चर बैंक (निफ्रा) को अगुवाइमा हाइड्रो इलेक्ट्रिसिटी इन्भेस्टटमेन्ट एन्ड डेभपलमेन्ट कम्पनी लिमिटेड (एचआइडिसिएल), कर्मचारी सञ्चय कोष र नबिल बैंकले ऋण लगानी गर्ने सहमति गरिसकेका छन् ।
आयोजना सम्पन्न गर्न कूल लागतको ७० प्रतिशत हुन आउने १६ अर्ब ९२ करोड रुपैयाँ बैंक तथा वित्तीय संस्थाबाट ऋण जुटाइने भएको छ । ३० प्रतिशतबाट ७ अर्ब २५ करोड रुपैयाँ जुटाइने भएको छ ।
आयोजना निर्माण सम्पन्न भई सञ्चालनमा आउँदा वार्षिक ६२३.४७ गिगावाट घन्टा विद्युत् उत्पादन हुनेछ । वर्षायाममा ४३०.२३ गिगावाट घन्टा र हिउँदयाममा १९३.२४ गिगावाट घन्टा विद्युत् उत्पादन हुनेछ ।
आयोजनाको विद्युत् खरिद गर्न नेपाल विद्युत् प्राधिकरणसँग विद्युत खरिद सम्झौता (पिपिए) भइसकेको छ । सम्झौताअनुसार प्राधिकरणले हिउँदको ६ महिनामा प्रतियुनिट ८.४० रुपैयाँमा र पिक आवरमा उत्पादित विद्युत् प्रतियुनिट १०.५५ रुपैयाँमा खरिद गर्ने छ । बर्खायाममा प्रतियुनिट ४.८० रुपैयाँका दरले खरिद गर्ने कम्पनीले जनाएको छ ।
यो आयोजनाको मुख्य संरचनाहरू नदीको बाँया किनारामा पर्दछन् । आयोजनाको ६१३९ मिटर लामो हेडरेस टनेल पाइप, १४०६ मिटर लामो प्रेसर स्टाफमार्फत पानीलाई भूमिगत विद्युतगृहमा पुर्याइनेछ । विद्युतगृहमा ३ वटा टवाईन जडान हुनेछन् । उत्पादित विद्युत् ५० किलोमिटर टाढा रहेको प्राधिकरणको बाफिकोट सबस्टेसनमा जोडिनेछ ।
.jpg)
