चिलिमेले निर्माण गर्ने ८७ मेगावाटको सेती नदी-३ को इआइए प्रतिवेदन तयार

काठमाडौं । चिलिमे जलविद्युत कम्पनी लिमिटेडले ८७ मेगावाटको सेती नदी–३ आंशिक जलाशय आयोजनाको वातावरणीय प्रभाव मुल्यांकन (इआइए) प्रतिवेदन तयार भएको छ । कम्पनीले सुदुरपश्चिम प्रदेशको बझाङ जिल्लामा निर्माण गर्न लागेका आयोजनाको प्रतिवेदन तयार पारेको हो ।

तयार भएको प्रतिवेदन स्वीकृतिका लागि वन तथा वातावरणमा मन्त्रालयमा बुझाएको कम्पनीले जनाएको छ । मन्त्रालयले उक्त प्रतिवेदनमा राय/सुझाव माग गरेको छ । मन्त्रालयले आयोजना निर्माण गर्दा पर्ने सक्ने प्रतिकुल असरका बारेमा आयोजना प्रभावित स्थानीय र सर्वसाधारणसँग ७ दिनभित्र राय÷सुझाव पठाउन आग्रह गरेको छ ।

आयोजनाको बाँध १४ मिटर अग्लो र ६७ मिटर लामो बन्ने चिलिमेले जानकारी दिएको छ । बाँधमा ३ लाख घनमिटर क्षमताको पोखरी बाट ४२५१ मिटर लामो सुरुङमार्फत पाननिलाई विद्युतगृहमा पुर्याइनेछ ।

आयोजनाको विद्युतगृह जयपृथ्वी नगरपालिकाको सुतियामा भूमिगत निर्माण हुनेछ । आयोजनाबाट उत्पादन भएको विद्युत नेपाद विद्युत प्राधिकरणले प्रस्ताव गरेको चैनपुर सबस्टेसनमा जोडिने भएको छ ।

यो कम्पनीले सहायक कम्पनीहरूबाट २७० मेगावाटका ३ ठुला आयोजना निर्माण गरिरहेको छ । १११ मेगावाटको रसुवागढी र ५७ मेगावाटको सान्जेनको काम अन्तिम चरणमा पुगेको छ । १०२ मेगावाटको मध्य भोटेकोसी जलविद्युत आयोजना निर्माणाधीन छ । २२ मेगावाटको चिलिमे जलविद्युत केन्द्रले विद्युत उत्पादन गरिरहेको छ ।