ऊर्जा खबर
काठमाडौं । नेपाल विद्युत प्राधिकरण डोटी वितरण केन्द्रका १० जना कर्मचारी काेरोना (काेभिड–१९) भाइरसबाट संक्रमित भएका छन् । डाेटी जिल्ला अस्पतालमा गरिएकाे स्वाव परीक्षणपछि उनीहरूमा काेभिड–१९ संक्रमण पुष्टी भएकाे हाे ।
केही कर्मचारीमा काेभिड–१९ काे लक्षण देखिएपछि परीक्षण गर्दा रिपाेर्ट पाेजेटिभ आएकाे वितरण केन्द्र प्रमुख कपिल जाेशीले बताए । ‘लक्षण देखिएका कर्मचारीको परीक्षण गर्दा सुरुमा ३ जनाकाे रिपोर्ट पोजेटिभ आयो,’ उनले ऊर्जा खबरसँग भने, ‘पछि अरु कर्मचारीको पनि परीक्षण गर्यौं । थप ७ जनामा पनि संक्रमण देखियो ।’
उनले दाेस्राे पटक ६ जनाको परीक्षण गर्दा २ जनामा कोरोना पुष्टि भएको बताए । तेस्राे पटक १२ कर्मचारीको परिक्षण गर्दा ५ जनामा कोरोना पुष्टि भएको थियाे। संक्रमण पुष्टी भएकामध्ये ४ जना आफ्नाे घरमै क्वारेन्टीनमा बसेका छन् ।
बाँकी ६ जनालाई कार्यालयको क्वाटरमा क्वारेन्टीनमा राखिएकाे वितरण केन्द्रले जनाएकाे छ । अहिले संक्रमित कर्मचारीमा गम्भिर लक्षण नदेखिएकाले अनुकुलताअनुसार क्वारेन्टीनमा राखिएकाे वितरण केन्द्रले जनाएकाे छ ।
देशभर काेराेनाकाे संक्रमण बढ्दै जाँदा प्राधिकरण कर्मचारी पनि संक्रमित हुन थालेका छन् । प्राधिकरणले सुरक्षाका उपाय अपनाएर सावधानीपूर्वक खटिन कर्मचारीलाई निर्देशन दिइसकेकाे छ ।
