ऊर्जा खबर
काठमाडौं । नेशनल हाइड्रो पावर कम्पनी लिमिटेडको खुद नाफा घटेको छ । कम्पनीको चालु आर्थिक वर्ष २०७८/७९ को दोस्रो त्रैमाससम्मको अवधिमा खुद नाफा घटेको हो ।
गत वर्षको यही समय अवधिको तुलनामा करिब ५५ लाख ६ हजार ८ सय रुपैयाँ खुद नाफा घटेको कम्पनीले जनाएको छ । कम्पनीका अनुसार ४.५ मेगावाटको तल्लो इन्द्रावती जलविदुत आयोजनाको अध्ययन तथा सुरुङ पुनःनिर्माण गर्नुपर्ने भएको खुद नाफा घटेको हो ।
यो अवधिमा कम्पनीले ८५ लाख ४९ हजार रुपैयाँ खुद नाफा कमाएको छ । गत वर्षको यही समय अवधिमा १ करोड ४० लाख ५६ हजार रुपैयाँ खुद नाफा कमाएको थियो ।
यो अवधिमा ७.५ मेगावाटको इन्द्रावती–३ जलविद्युत गृहको विद्युत बिक्रीबाट हुने आम्दानी भने बढेको कम्पनीले जनाएको छ । कम्पनीका अनुसार यो अवधिमा विद्युत बिक्रीबाट ५ करोड ५५ लाख १३ हजार ७ सय रुपैयाँ आम्दानी गरेको छ । गत वर्ष यही अवधिमा ५ करोड ४५ लाख ५ हजार रुपैयाँ आम्दानी गरेको थियो ।
तल्लो इन्द्रावतीको अध्ययन अनुमति प्राप्त गरी आयोजनाको प्राविधिक तथा वातावरणीय अध्ययनको लागि परामर्शदाता नियुक्त गरी स्थलगत सर्वेको काम सम्पन्न गरेको कम्पनीले जनाएको छ । साथै, आयोजनाको भत्किएको सुरुङ तथा अन्य संरचनाको पुनः निर्माण कार्य भइरहेको छ ।
