ऊर्जा खबर
काठमाडौं । २५ मेगावाटको सेती नदी जलविद्युत आयोजनाले लगानी जुटाएको छ । कास्कीको सेती नदीमा निर्माण सुरु भएको आयोजनामा एनएमबी बैंकको अगुवाईमा ३ बैंक तथा वित्तीय संस्थाले साढे ३ अर्ब रुपैयाँ ऋण लगानी गर्न लागेका हुन् ।
आयोजनामा एनएमबिसहित कर्मचारी सञ्चय कोष र कृषि विकास बैंकले ऋण लगानी गर्ने प्रतिवद्धता जनाएका छन् । बैंक र आयोजनाको प्रवर्द्धक भिजन लुम्बिनी ऊर्जा कम्पनीबीच बिहीबार वित्तीय व्यवस्थापन सम्झौतामा हस्ताक्षर भएको छ ।
सम्झौताअनुसार अगुवाई गरेको एनएमबि बैंक एक्लैले २ अर्ब २० करोड रुपैयाँ आयोजनामा लगानी गर्न लागेको कम्पनीका अध्यक्ष जगतबहादुर पोखरेलले बताए । उनले कर्मचारी सञ्चय कोषले ८० र कृषि विकास बैंकले ५० करोड रुपैयाँ ऋण लगानी गर्न लागेको बताए ।
कूल ५ अर्ब लागत अनुमान गरिएको आयोजनामा बैंक तथा वित्तीय संस्थाले गर्न लागेको लगानी ७० प्रतिशत हो । ३० प्रतिशत (डेढ अर्ब रुपैयाँ) प्रवद्र्धकको स्वपुँजी लगानी हुनेछ । आयोजनामा देशका ठूला सहरका प्रतिष्ठित घरानाले स्वपुँजी लगानी गरेको कम्पनीले जनाएको छ ।
आयोजना सम्पन्न भएपछि प्रभावित क्षेत्रका स्थानीय र सर्वसाधारणमा सेयर निष्कासन गरेर पनि स्वपुँजी लगानी जुटाइनेछ । आयोजना निर्माण थाल्नुअघिका सबै कानुनी प्रक्रिया पूरा भइसकेको छ ।
हाइड्रो कन्सल्ट एण्ड विडिए जेभीले आयोजनाको विस्तृत अध्ययन प्रतिवेदन तयार गरिसकेको छ । कम्पनीले आयोजनाको पहुँच मार्ग निर्माण तथा आवश्यक जग्गा अधिग्रहण गरिसकेको पाेखरेलले जानकारी दिए ।
२०७९ साउनभित्र आयोजना सम्पन्न गरेर विद्युत उत्पादन सुरु गर्ने लक्ष्य छ । आयोजना सम्पन्न भई उत्पादन हुने विद्युत विद्युतगृहबाट ४ किलोमिटर टाढाको १३२ केभी लाहाचोक सबस्टेसनमा लगेर जोडिनेछ । ४ किलोमिटर प्रसारण लाइन कम्पनीले नै निर्माण गर्नेछ । आयोजनाले वार्षिक १४८ गिगावाट घन्टा विद्युत उत्पादन गर्नेछ ।
.jpg)
