निफ्राले जारी गरेको ५ अर्बको ‘हरित ऊर्जा ऋणपत्र’मा साढे १५ अर्बको आवेदन

काठमाडौँ । नेपाल इन्फ्रास्ट्रक्चर बैंक लिमिटेड (निफ्रा) ले जारी गरेको ‘हरित ऊर्जा ऋणपत्र’ मा माग रकमको ४ गुणा बढी आवेदन परेको छ । बैंकले वार्षिक ६ प्रतिशत ब्याज दिने गरी ७ वर्ष अवधि भएको ५ अर्ब रुपैयाँको हरित ऊर्जा ऋणपत्र जारी गरेको थियो ।

निष्काशन तथा बिक्री प्रबन्धक एनआइएमबि एस क्यापिटल लिमिटेडले आवेदनका लागि २०८२ जेठ १८ गतेदेखि जेठ २५ गतेसम्मको समय दिएर ऋणपत्र निश्काशन गरेको थियो । उक्त सयमसीमाभित्र सर्वसाधाणतर्फको २ अर्ब रुपैयाँका लागि सामूहिक लगानी कोषहरू बाहेक जम्मा ३ हजार ३३ योग्य लगानीकर्ताबाट ३ अर्ब ३८ करोड ५४ लाख ७८ हजारका लािग लागि आवेदन परेको थियो । निजी प्लेसमेन्ट तर्फको ३ अर्बका लागि जम्मा २३ योग्य लगानीकर्ताबाट  १५ अर्ब ५९ करोड ५५ लाख रुपैयाँको ऋणपत्र माग गर्दै आवेदन परेको थियो । यस ऋणपत्रमा समग्रमा माग गरिएको भन्दा करिब ४ गुणा बढीले आवेदन परेको र प्रारम्भिक बाँडफाँडको कार्य सम्पन्न भई अन्तिम बाँडफाँड हुने चरणमा रहेको बैंकले जनाएको छ ।

नेपालमै पहिलो पटक सार्वजनिक रूपमा जारी गरिएको यस हरित ऊर्जा ऋणपत्र निष्काशनबारे सम्पन्न भएकोबारे निफ्रा ग्लोबल ग्रीन ग्रोथ इन्ष्टिच्युट (जिजिजिआई र कोरिया इन्टरनेशनल कोअपरेशन एजेन्सी (कोइका) समेतको सहआयोजनामा मंगलबार समीक्षात्मक कार्यक्रम आयोजना गरेको थियो । 
कार्यक्रममा नेपालमा हरित ऋणपत्र जारी हुनुको महत्त्व र नेपालको दिगो विकासमा यस्ता ऋणपत्रले पार्ने सकारात्मक प्रभावबारे समीक्षात्मक छलफल गरिएको थियो ।

वन तथा वातावरण मन्त्रालयका मन्त्री ऐनबहादुर शाही ठकुरीको उपस्थिमिा भएको कार्यक्रममा राष्ट्रिय योजना आयोगका सदस्य डा. आरपी बिच्छा, नेपालका लािग दक्षिण कोरियाको राजदूत टि–योङ पार्कको समेतको उपस्थिति थियो । जिजिजिआईका नेपालका लागि आवसीय प्रतिनिधि लाउरा जलसजोकीले कार्यक्रमको अध्यक्षता गरेकी थिइन् ।

कार्यक्रममा अर्थ मन्त्रालयका सहसचिव धनीराम शर्मा, नेपाल धितोपत्र बोर्डबाट कार्यकारी निर्देशक डा. नवराज अधिकारी, नेपाल राष्ट्र बैंकका सहायक निर्देशक विनित जैन वैगानी, बैंकको तर्फबाट प्रमुख कार्यकारी अधिकृत कृष्णबहादुर अधिकारी र कोइकाका कन्ट्री डाइरेक्टर मुहेओन कोङसमेतले धारणा राखेका थिए ।