ऊर्जा खबर
काठमाडौं । नेपाल राष्ट्र बैंकले नेपाल बंगलादेश बैंक (एनबी) नबिल बैंकमा गाभ्न सैद्धान्तिक सहमति प्रदान गरेको छ । राष्ट्र बैंकले आइतबार बंगलादेशलाई नबिलमा गाभ्न गरेको प्रस्तावको सहमति प्रदान गरेको हो ।
नबिलले एनबी बैंकलाई गाभ्नका गत पुस २९ गते प्रारम्भिक सम्झौता गरेको थियो । एनबी बैंकलाई गाभेपछि नबिल बैंक चुक्ता पुँजी, कर्जा लगानी, निक्षेप परिचालन, खुद मुनाफा तथा अन्य वित्तीय सूचकहरूका आधारमा अग्रणी बैंककोरूपमा स्थापित हुने देखिएको छ ।
हाल नबिल बैंकको चुक्ता पुँजी करिब १८ अर्ब ५० करोड र एनबी बैंकको करिब १० अर्ब ९ करोड रहेको छ । नबिलले प्राप्त गरेपछि हाल सहमत गरिएको स्वाप रेसियो अनुरुप बैंकको चुक्ता पुँजी करिब २३ अर्बको पुग्नेछ ।
गत पुस मसान्तसम्ममा नबिल बैंकसँग २९ अर्ब भन्दा बढी र एनबी बैंकसँग १४ अर्ब भन्दा बढी प्राथमिक पुँजी रहेकोमा प्राप्ति पश्चात् बैंकको प्राथमिक पुँजी ४४ अर्ब भन्दा बढी हुनेछ । यसले राष्ट्रिय गौरव तथा निर्माणका क्रममा रहेका ठूला आयोजनाहरुमा नबिल बैंकको प्रमुख वित्तीय लगानी रहँदै आएकोमा थप व्यवसाय विस्तार गर्न मद्दत पुग्ने देखिने बैंकले जनाएको छ ।
यसैगरी, ६ महिनाको अवधिमा नबिल बैंकको खुद मुनाफा २ अर्ब १८ करोड भन्दा बढी तथा एनबी बैंकको ८१ करोड भन्दा बढी रहेकोमा नबिलले प्राप्त गरिसकेपछि बैंकको खुद मुनाफा २ अर्ब ९९ करोड भन्दा बढी कायम हुनेछ ।
गाभ्ने प्रक्रिया पूरा भएपछि नबिल बैंकको कूल कर्जा करिब ३ खर्ब १ अर्ब र कुल निक्षेप करिब ३ खर्ब १८ अर्ब कायम हुनेछ । यसका साथै, एनबी बैंकसँग एकीकृत कारोबार सुरु भएपछि नबिल बैंकको शाखा सञ्जाल २४१ र एटीएम संख्या २९२ पुग्नेछ ।
