ऊर्जा खबर
काठमाडौँ । चालू आर्थिक वर्ष (आव २०८१/८२) को पहिलो महिना अर्थात् साउनमा २ हजार १०९ वटा साना–ठूला विद्युतीय सवारी साधन भित्रिएका छन् । यो महिनामा विद्युतीय साइकल, मोटरसाइकल, स्कुटर, तीन पाङ्ग्रे, कार, जीप र भ्यान, हाइब्रिड (विद्युत् र पेट्रोल दुवैबाट चल्ने) गरी उक्त सङ्ख्याका सवारी साधन भित्रिएका हुन् ।
भन्सार विभागको तथ्याङ्क अनुसार यो महिना विद्युतीय सवारीमा सबैभन्दा बढी ७५८ थान मोटरसाइकल तथा स्कुटर भित्रिएका छन् । त्यस्तै, ६४६ विद्युतीय तीन पाङ्ग्रे सवारी भित्रिएका छन् ।
त्यस्तै, ३८१ थान विद्युतीय कार, जीप र भ्यान भित्रिएका छन् । जडान नगरिएका तीन पाङ्ग्रे सवारी समेत २८१ थान भित्रिएका छन् । १९६ थान विद्युतीय साइकल र ८ थान हाइब्रिड गाडी समेत भित्रिएका छन् ।
नेपालमा खास गरी भारत, चीन, जापान, जर्मनी र सिंगापुरबाट यस्ता विद्युतीय सवारी भित्रिएको तथ्याङ्कले देखाएको छ ।
साउन महिनामा कुल १ अर्ब १० करोड ३८ लाख ८७ हजार रुपैयाँ बराबरका २ हजार १ सय ९ थान विद्युतीय सवारी साधन नेपाल भित्रिएका हुन् । यसबाट राज्यलाई कुल ६६ करोड ९७ लाख १८ हजार राजस्व प्राप्त भएको छ ।
नेपालमा विद्युत्को उपलब्धता बढ्दै गएको, विश्व बजारमा विद्युतीय सवारी साधनको मूल्य सस्तो हुँदै गएको, कार्बन उत्सर्जन कटौतीमा नेपालसहितका विश्वका राष्ट्रले जनाएका प्रतिबद्धता पूरा गर्न समेत विद्युतीय सवारीको उत्पादन, आयात, प्रयोग र उपलब्धता बढ्दै गएको पाइएको छ ।
