ऊर्जा खबर
काठमाडौँ । भारतीय अटो कम्पनी अल्ट्राभोइलेटले उत्पादन गरेको स्पोर्टी इ–बाइक ‘एफ ७७’ नेपाली बजारमा उपलब्ध हुने भएको छ । वैशाखको पहिलो सातासम्ममा उक्त बाइक नेपाली बजारमा सार्वजनिक गर्ने तयारी भइरहेको आधिकारिक बिक्रेता कम्पनी केडिया इन्टरनेशनलले जनाएको हो । विगत ५ वर्षदेखि यो बाइक विकासमा लागेको उत्पादक कम्पनीले सन् २०२४ जनवरीदेखि मात्र भारतीय बजारमा बिक्रीवितरण गर्न सफल भएको थियो ।
कम्पनीका अनुसार १० लाख रुपैयाँ पर्ने उक्त बाइक सुरूमा खरिद गर्ने ३० जना ग्राहकलाई ९ लाख ९९ हजार रूपैयाँमै उपलब्ध हुने छ ।
अन्तर्राष्ट्रिय बजारमा ओरिजिनल र रेकन भेरियन्टमा उपलब्ध रहेको यो बाइक नेपालमा भने रेकन भेरियन्टमा मात्र उपलब्ध हुने भएको छ । उक्त भेरियन्टको इबाइकमा १०.३ किलोवाट ब्याट्री प्याकले एक पटक फूल चार्ज गरेपछि ३०७ किलोमिटर दूरी पार गर्नेछ भने अर्कोमा ७.१ किलोवाट ब्याट्री प्याकले २०७ किमी दूरी पार गर्नेछ ।
बाइकमा भारतको अटो कम्पनी टीभीएस मोटरले पनि यसमा लगानी गरेको छ । बाइकमा १३४० एमएमको ह्विलबेस र ८०० एमएमको सिट उपलब्ध छ । कम्पनीका अनुसार बाइकको ब्याट्रीमा भेरियन्ट अनुसार ३ वर्षदेखि ५ वर्षसम्मको वारेन्टी दिइएको छ । सीमित संस्करणका बाइकमा भने ८ वर्षसम्मको वारेन्टी र मूल्यसमेत फरक छ ।
यो इ–बाइक लिन इच्छुक ग्राहकले हालसम्म १ सय ९० देशबाट ७० हजारभन्दा बढी युनिट प्रि–बुकिङ गरिसकेको कम्पनीले जनाएको छ ।
