ऊर्जा खबर
काठमाडौं । निजी क्षेत्रको लगानीमा देशका विभिन्न ठाउँमा पहिचान भइ अघि बढेका ३२०० बढी मेगावाटको विद्युत आयोजना निर्माणाधीन छन् । नेपाल विद्युत प्राधिरकणसँग विद्युत खरिद सम्झौता (पिपिए) गरी लगानी जुटेका १४१ आयोजनाको निर्माण भइरहेको हो ।
२०८२ साल भित्र निर्माण सम्पन्न भई राष्ट्रिय प्रसारण प्रणालीमा जोडिने गरी ३२ सय ८० मेगावाटका यी आयोजना निर्माणको विभिन्न चरणमा रहेको नेपाल विद्युत प्राधिकरणले जनाएको छ ।
यी आयोजनामध्ये ३२२८ मेगावाट जलविद्युत १३२ र ५२.८ मेगावाटका ९ सौर्य आयोजनाको निर्माण भइरहेको प्राधिकरणको ‘विद्युत’ नामक पुस्तकमा उल्लेख गरिएको छ ।
निर्माणाधीन आयोजनामध्ये सबैभन्दा ठुलो रसुवामा २१६ मेगावाटको माथिल्लो त्रिसुली–१
छ । यो आयोजना नेपाल वाटर एण्ड इनर्जी डेभलपमेन्ट कम्पनीले निर्माण गरिरहेको छ । कम्पनीले २०७४ माघ १४ गते प्राधिकरणसँग पिपिए (विद्युत खरिद सम्झौता) गरी अघि बढाएको आयोजनाबाट २०८० भित्र उत्पादन सुरु गर्नुपर्नेछ ।
त्यसैगरी, १४० मेगावाटको तनहु आयोजना तनहुँ हाइड्रो पावर कम्पनीले निर्माण गरिरहेको छ । यो आयोजनाको पिपिए २०७५ असार १५ गते भएको थियो । यस्तै, १११ मेगावाटको रसुवागढी र १०२ मेगावाटको मध्य भोटेकोशीलगायतका जलविद्युत आयोजनाको निर्माण भइरहेको छ ।
यस्तै, सौर्य ऊर्जातर्फ सबैभन्दा ठुलो पिवर इनर्जी प्रालिले १०/१० मेगावाटको नैनापुर ब्लक–१ र ब्लक–२ आयोजना निर्माण गरिरहेको छ । यस्तै, बाँकी आयोजनाको पनि निर्माण भइरहेको प्राधिकरणले जनाएको छ ।
