ऊर्जा खबर
काठमाडौं । सूदुरपश्चिम प्रदेशको बझाङस्थित कालंगा बेसिनमा निर्माणाधीन १०.७ मेगावाटको माथिल्लो सानीगाड जलविद्युत आयोजना ८० प्रतिशत पूरा भएको छ । बुङ्गल हाइड्रो कम्पनीले निर्माण गरिरहेको आयोजनाकाे निर्माण अन्तिम चरणमा पुगेको हो ।
बाँध क्षेत्रका सबै सिभिल संरचनाको काम सकिएको आयोजना संयोजक सुनिल रेग्मीले बताए । मुख्य सुरुङ पनि खनेर सकिन लागेकाे बताए । ‘ २ हजार ८ सय १२ मिटर लामाे मुख्य सुरुङ २ हजार २२ मिटर खनेर सकियाे,’ उनले ऊर्जा खबर सँग भने, ‘बाँकी ७ सय ९० मिटर आउने असोजभित्र पूरा हुन्छ ।’
कमजाेर भौगोलिक अवस्थाका कारण सुरुङ खन्न धेरै समय लागेकाे पनि उनले बताए । आयोजनामा जडान हुने २ हजार ३ सय मिटरमध्ये ८ सय मिटर बिछ्याइसकेको छ । बाँकी एक हजार ५ सय मिटर कात्तिकभित्र पूरा गर्ने लक्ष्य छ ।
विद्युतगृहमा पनि सिभिल संरचनाको काम पूरा भएको छ । अहिले इलेक्ट्राेमेकानिकल उपकरण जडानको काम धमाधम भइरहेको छ ।
आयोजनाको सबै काम पूरा गरी २०७८ मंसिर पहिलो सातादेखि विद्युत उत्पादन गर्ने लक्ष्य छ । २०७५ मंसिरदेखि निर्माण सुरु भएको आयोजनाबाट २०७७ जेठमा नै विद्युत उत्पादन गर्ने तालिका भएपनि आयोजना स्थल दुर्गम क्षेत्रमा पर्ने हुँदा निर्माण सामाग्री ढुवानी समस्या तथा प्रतिकुल मौसमका कारण काम प्रभावित हुँदा लक्ष्यअनुसार प्रगति हुन नसकेको कम्पनीले जनाएको छ ।
आयोजना सम्पन्न भई उत्पादन हुने विद्युत १३२/३३ केभी बलाँच सबस्टेसनमा जोडिनेछ । आयोजना सम्पन्न गर्न २ अर्ब २० करोड रुपैयाँ लागत अनुमान गरिएको छ । कालंका बेसिनमा एउटै समूहले छुट्टा छुट्टै कम्पनीमार्फत साढे ६४ मेगावाटका आयोजना निर्माण गरिरहेको छ ।
माथिल्लो सानीगाडसँगै ३८.४६ मेगावाटको माथिल्लो कालंगागाड र १५.३३ मेगावाटको कालंगागाड निर्माणाधीन छन् । यी आयोजनाको विद्युत राष्ट्रिय प्रसारण प्रणालीमा जोड्न ४० किलोमिटर लामो प्रसारण लाइन निर्माण हुँदैछ ।
.jpg)
