ऊर्जा खबर
काठमाडौं । देशभर सञ्चालनमा रहेका उद्योगले माग अनुसारको भोल्टेज लेभलमा विद्युत लोड लिन पाउने भएका छन् । नेपाल विद्युत प्राधिकरणले उद्योगको आपूर्ति व्यवस्था दिगो र गुणस्तरीय बनाउन मागअनुसारको लोड दिन लागेको हो ।
प्रसारण तथा वितरण प्रणालीको सुधार गरी विद्युत आपूर्ति व्यवस्थापन नियमित गर्न उद्योगलाई मागे जति लोड दिने तयारी भइरहेको प्राधिकरणले जनाएको छ । प्राधिकरणका अनुसार यो सुविधा पहिले नै निर्माण सम्पन्न भइसकेका तथा निर्माण पूरा भई सञ्चालनमा आउन लागेका सबै उद्योगले पाउने छन् ।
उद्योगले आवश्यकताअनुसार जुनसुकै भोल्टेज लेभलमा नयाँ लोड लिन पाउनुका साथै पहिले नै लिएको भोल्टेज लेभलमा लोड थप गर्नसमेत सक्नेछन् ।
प्राधिकरणले नयाँ वा थप लोड लिन चाहने उद्योगले ७ दिनभित्र सम्पूर्ण विवरणसहित आवेदन पेश गर्नुपर्ने जनाएको छ ।आवेदन पेश गर्दा उद्योगीले नयाँ वा थप लोड लिन चाहाने उद्योगको नाम, ठेगाना, सम्पर्क नम्बर, कुन वितरण केन्द्रबाट सेवा लिने हो त्यसको विवरण खुलाउन भनिएको छ । य
यस्तै, माग गरेको लोड, एमभिए र भोल्टेज, केभी पनि उल्लेख गर्नुपर्नेछ । साथै, विद्युत आपूर्ति सुरु हुनुपर्ने मिति, उद्योगको पूर्वाधार निर्माणको अवस्था तथा सम्पन्न हुने मिति एवं पहिले नै विद्युत आपूर्तिका लागि प्राधिकरणमा आवेदन दिएको/नदिएकोबारे जानकारी, आवेदन दिएको भए मितिसमेत उल्लेख गर्नुपर्ने प्राधिकरणले जनाएको छ ।
प्राधिकरणले उद्योगको भोल्टेज सुधार तथा माग अनुसारको विद्युत आपूर्ति व्यवस्थापन मिलाउन प्रसारण र वितरण लाइनको मर्मत एवं सबस्टेसनको स्तरोन्नति गर्दै आएको छ । उद्योगले माग अनुसारको विद्युत सेवा पाउने भएपछि ‘लो भोल्टेज’ को समस्या समाधान हुने प्राधिकरणको दाबी छ ।
