ऊर्जा खबर
काठमाडौं । नेपाल विद्युत प्राधिकरणले प्रयोगबिहिन अवस्थामा रहेका सवारी साधन लिलाम प्रक्रियाबाट बिक्री गर्ने भएको छ । प्राधिकरणले सम्पूर्ण निर्देशनालय तथा मातहतका आयोजनामा रहेका बेकम्बा एवं प्रयोगमा आउन नसकेका सबै प्रकारका सवारी साधनहरू लिलाममा राखी बाेल– कबाेल प्रक्रियाबाट बिक्री गर्न लागेको हो ।
प्रयोगबिहिन अवस्थाका सवारी साधनको लिलाम बिक्री प्रक्रिया अघि बढाउन ‘लिलाम बिक्री मूल्याङ्कन समिति’ गठन भइसकेको प्राधिकरणले जनाएको छ । केशवराज वलीको संयोजकत्वमा गठित समितिले सबै निर्देशनालय तथा मातहतका आयोजनासँग लिलाम बिक्रीका लागि प्रयोगबिहिन अवस्थाका सवारी साधनको विवरण माग गरेको छ ।
समितिले लिलाम बिक्री प्रयोजनका लागि प्राधिकरणका निर्देशनालय तथा मातहतमा रहेका कार्यालय र आयोजनामा रहेका काम नलाग्ने सबै प्रकारका सवारी साधनहरूको विवरण मागेको हो । निर्देशनालय मातहतका कार्यालय तथा आयोजनालाई फागुन २६ गतेसम्ममा प्रयोग बिहिन सवारी साधनको विवरण समितिको कार्यालय रहेको सामान्य सेवा विभाग, सामान्य प्रशासन महाशाखामा उपलब्ध गराउन भनिएको प्राधिकरणले जनाएको छ ।
प्राधिकरणका विभिन्न कार्यालय तथा आयोजनामा करोडौं मूल्य परेका सवारी साधन प्रयोगबिहिन अवस्थामा छन् ।
