ऊर्जा खबर
काठमाडौं । ३३ केभी दुहबी–खनार डबल सर्किट प्रसारण लाइनको स्तरोन्नतिका क्रममा एक महिनासम्म विद्युत सेवा प्रभावित हुने भएको छ । प्रसारण लाइनको दुहबीदेखि खनारसम्मको खण्डको स्तरोन्नति गर्न दैनिक विद्युत लाइन काटिने भएको हो ।
मंगलबार बिहानबाट विद्युत लाइन काटेर प्रसारण लाइनको स्तरोन्नति कार्य सुरु गरिएको वितरण केन्द्र प्रमुख सुरेन्द्रकुमार साहले बताए । उनका अनुसार अहिले भएको एसिएसआर डग कन्डक्टर (पातलो तार)को स्थानमा एचटिएलएस कन्डक्टर (मोटो तार) राखेर स्तरोन्नति गर्ने कार्य सुरु भएको छ ।
‘बिहानैदेखि प्रसारण लाइनमा एचटिएलएस कन्डक्टर राख्न सुरु गरिएको छ,’ उनले ऊर्जा खबरसँग भने,‘यो क्रम अब फागुन १२ गतेसम्म नियमित चल्नेछ ।’ उनले प्रसारण लाइनको स्तरोन्नतिको अवधिभर एक महिनासम्म दैनिक ९ घन्टा (बिहान ८ बजेदेखि साँझ ५ बजे) विद्युत लाइन काटिने बताए ।
लाइन काटिँदा दुहबीदेखि खनारसम्मको विद्युत सेवा प्रभावित हुने देखिएको छ । सकेसम्म ५ बजे अगाडि नै लाइन सुचारुको प्रयास गरिने पनि वितरण केन्द्रले जनाएको छ । यो प्रसारण ओभर लोड हुँदा आपूर्ति व्यवस्थापनमा समस्या हुँदै आएको थियो ।
लाइनको स्तरोन्नतिपछि यस क्षेत्रको विद्युत सेवाको गुणस्तरमा सुधार हुने साहले बताए । प्राधिकरणले प्रसारण लाइन, सबस्टेसन र वितरण लाइनको मर्मत तथा स्तरोन्नति गर्न सार्वजनिक सूचना निकालेर लाइन काट्ने गरेको छ ।
