ऊर्जा खबर
काठमाडौं । बिमा समितिले विभिन्न खालका व्यवसायमा वृद्धि गरेको बिमा शुल्क तत्कालका लागि कार्यान्वयन नगर्ने भएको छ । ऊर्जा तथा निर्माण व्यवसायमा संलग्न व्यक्ति तथा संघ संस्थाको विरोध तथा निरन्तरको आन्दोलनपछि समितिले आफ्नो योजना पुनर्विचार गर्ने भएको हो ।
समितिले जारी गरेको ‘मिनिमम रेट फर नन ट्यारिफ इन्स्योरेन्स बिजनेस’ सम्बन्धी निर्देशिकाले व्यवसायमा प्रतिकूल असर पर्ने भन्दै स्वतन्त्र ऊर्जा उत्पादकहरूको संस्था नेपाल (इपान) र निर्माण व्यवसायी महासंघले आन्दोलन गर्दै आएका थिए ।
समिति तथा व्यवसायीबीच सोमबार (बैशाख १२ गते) भएको छलफलपछि तत्कालका लागि निर्देशिका कार्यान्वयन नगर्ने र त्यसलाई संशोधनमा लैजाने विषयमा सहमति भएको इपानले जानकारी दिएको छ । निर्देशिका संशोधन गर्न समितिका कार्यकारी निर्देशक राजरमण पौडेलको संयोजकत्वमा १२ सदस्यीय उपसमिति गठन गरिएको छ ।
समितिलाई आवश्यक अध्ययन गरी ७ दिनभित्र प्रतिवेदन बुझाउन निर्देशन दिइएको छ । सोमबारको सहमतिपछि ऊर्जा तथा निर्माण व्यवसायीले आफ्ना सबैखालका आन्दोलन स्थगित गरेका छन् । यसअघि व्यवसायीहरूले निर्देशिका संशोधन गर्ने निर्णय नभएसम्म आन्दोलन जारी राख्ने र अर्थतन्त्रका गतिविधि ठप्प पार्ने समेतको धम्की दिँदै आएका थिए ।
