ऊर्जा खबर
काठमाडौं । तनहुँ हाइड्रो पावर लिमिटेडले निर्माण गर्न लागेको १२६ मेगावाटको तल्लो सेती आंशिक जलाशय जलविद्युत् आयोजनाको जग्गा अधिग्रहण प्रक्रिया अगाडि बढेको छ । नेपाल विद्युत् प्राधिकरणको सहायक कम्पनीले तनहुँ जिल्लामा पहिचान भएको आयोजनाको जग्गा प्राप्तिको काम अघि बढेको हो ।
यो आयोजना तनहुँमा निर्माणाधीन १४० मेगावाटको तनहुँ जलविद्युत् आयोजनाको प्रवर्द्धक कम्पनीले निर्माण गर्न लागेको हो । आयोजनाका विभिन्न संरचनाका लागि आवश्यक पर्ने निजी जग्गा अधिग्रहणको प्रक्रिया अघि बढाउने प्रस्ताव स्वीकृतिका लागि ऊर्जा, जलस्रोत तथा सिँचाइ मन्त्रालयमा पेस गरिएको कम्पनीले सार्वजनिक गरेको मासिक प्रतिवेदनमा उल्लेख छ ।
जग्गा प्राप्ति ऐन, २०३४ मा भएको व्यवस्था बमोजिम नेपाल सरकारबाट प्रारम्भिक अधिकारी तोकिएपछि आयोजनाका लागि आवश्यक पर्ने जग्गा अधिग्रहण सुरु गरिने कम्पनीले जनाएको छ ।
निर्माणाधीण १४० मेगावाटको तनहुँ जलाशययुक्त जलविद्युत् आयोजनाको टेलरेसबाट १८ किलोमिटर तल्लो तटिया क्षेत्रमा अवस्थित बन्दीपुर गाउँपालिकाका वडा नम्बर ६ तथा देवघाट गाउँपालिका वडा नम्बर ३ मा अवस्थित साराङ्गघाट नजिक सेती नदीमा आयोजना निर्माण गर्न लागिएको हो । आयोजनाको ३२ मिटर अग्लो बाँध निर्माण गरिने कम्पनीले जनाएको छ ।
कम्पनीका अनुसार पानीको प्रवाहलाई देवघाट गाउँपालिकाको वडा नम्बर ३ र ४ हुँदै जाने ६.८ किलोमिटर लामो सुरुङग मार्ग मार्फत नदीको प्रवाहलाई फर्काइ त्रिशुली र सेती नदीको संगमदेखि करिब १.५ किलोमिटर तल्लो तटिया क्षेत्रमा पर्ने देवघाट गाउँपालिका वडा नम्बर ४ मा त्रिशुली नदीको दाया किनारामा बन्ने विद्युत्गृहमा पानीलाई खसालीनेछ ।
देवघाट गाउँपालिका–४ गाईघाटमा अर्धभूमिगत विद्युतगृह निर्माण गरी विद्युत् उत्पादन गरिनेछ । उत्पादित विद्युत तनहुँ जलविद्युत् आयोजनाले निर्माण गरेको २२० केभी दमौली–नयाँ भरतपुर प्रसारण लाइनमा जोडी राष्ट्रिय विद्युत् प्रणालीमा समाहित गरिनेछ । यसका लागि करिब दुई किलोमिटर प्रसारण लाइनको निर्माण गर्नुपर्छ ।
आयोजना निर्माण थालेको ४ वर्षमा व्यवसायिक उत्पादन गर्ने लक्ष्य राखिएको छ । २०८१ मा ठेक्का निकालेर निर्माणमा जाने योजना रहेको कम्पनीले जनाएको छ । यो आयोजनाबाट वार्षिक सरदर ५२१ गिगावाट घन्टा विद्युत उत्पादन गर्नेछ ।
.jpg)
