ऊर्जा खबर
काठमाडौं । नेपाल पावर एक्सचेन्ज कम्पनीले विद्युत उत्पादन गरिरहेका जलविद्युत केन्द्रलाई क्यू–३० मा झारेर सञ्चालन गर्न अध्ययन थालेको छ । उद्योगको विद्युत माग आन्तरिक उत्पादनबाट नै व्यवस्थापन गर्ने उद्देश्यले क्यू–४० का जलविद्युत केन्द्रलाई क्यू–३० मा झारेर अधिकतम क्षमतामा चलाउन अध्ययन थालिएको हो ।
उद्योगले अहिले पनि मागे जति विद्युत पाउन नसकेकाले सञ्चालनमा रहेका जलविद्युतगृह नै अधिकतम क्षमतामा चलाउने गरी अध्ययन थालेका कम्पनीका प्रबन्ध सञ्चालक आशिष गर्गले बताए । ‘जलविद्युतमा क्यू–३० को सीमा हटिसकेको छ,’ उनले ऊर्जा खबरसँग भने, ‘अहिले सञ्चालनमा रहेका जलविद्युतगृहमा नै एउटा टर्वाइन थपेर स्रोतको अधिकतम उपयोग हुने गरी विद्युत उत्पादन गर्न सकिन्छ कि भनेर अध्ययन गरिरहेका छौं ।’
उनले देशभरमा उद्योगमा हुने विद्युत खपतको अवस्थाबारे पनि अध्ययन भइरहेको जानकारी दिए । उद्योगहरूको अधिकतम मागको अध्ययन गरी निजी क्षेत्रका जलविद्युतगृहबाट उत्पादन बढाएर आन्तरिक बजार व्यवस्थापनको काम कम्पनीले गरिरहेको उनले बताए ।
क्यू–४० का जलविद्युतगृहलाई क्यू–३० मा झारेर चलाउँदा देशभित्रको स्रोतको पूर्ण उपयोग हुने तथा उद्योगले पनि दिगो र गुणस्तीय विद्युत सेवा पाउने उनको भनाइ छ । कम्पनीको काम छिमेकी मुलुकमा विद्युत निर्यात गर्ने नभई आन्तरिक बजार खोज्ने पनि भएकाले उत्पादन र खपत बढाउने क्षेत्रको अध्ययन भइरहेको उनले बताए ।
कम्पनीले आन्तरिक तथा बाह्य बजारमा विद्युत व्यापार गर्ने स्वीकृतिका लागि ऊर्जा, जलस्रोत तथा सिँचाइ मन्त्रालयमा आवेदन दिएको छ । सरकार परिवर्तनपछि मन्त्रालयमा ऊर्जा,जलस्रोत तथा सिँचाइ मन्त्री पम्फा आइसकेकाले अब प्रक्रिया अघि बढ्ने कम्पनीले जनाएको छ ।
