ऊर्जा खबर
काठमाडौं । निर्माण सम्पन्न भइसकेका २ जलविद्युत कम्पनीले करिब १ करोड कित्ता साधारण सेयर निष्कासनको तयारी गरेका छन् । ५२.४ मेगावाटको लिखु–४ जलविद्युत आयोजनाको प्रवद्र्धक ग्रीन भेन्चर र ३६ मेगावाटको माथिल्लो बलेफी ‘ए’ जलविद्युत आयोजनाको प्रवद्र्धक बलेफी हाइड्रो पावर कम्पनीले साधारण सेयर निष्कासन गर्न लागेका हुन् ।
नेपाल धितोपत्र बोर्डले यी दुवै कम्पनीलाई आयोजना प्रभावित क्षेत्रका स्थानीय र सर्वसाधारणका लागि सेयर निष्कासनको अनुमति दिएको छ । बोर्डले गत आइतबार एकै पटक यी दुई कम्पनीलाई साधारण सेयर निष्कासनको अनुमति दिएको हो ।
ग्रीन भेन्चरले ६२ करोड ५० लाख रुपैयाँ मूल्य बराबरको ५२ लाख ५० हजार कित्ता साधारण सेयर निष्कासन गर्न अनुमति पाएको छ । कम्पनीले निष्कासन गर्न लागेको साधारण सेयर स्वपुँजी लगानीको २० प्रतिशत हो ।
कम्पनीले पहिलो चरणमा आयोजना प्रभावित क्षेत्रका स्थानीयबासी र दोस्रो चरणमा सर्वसाधारणका लागि सेयर निष्कासन गरी बाँडफाँड गर्नेछ । कम्पनीको साधारण सेयर निष्कासन गर्न लक्ष्मी क्यापिटललाई बिक्री प्रबन्धक नियुक्त गरिएको छ ।
कम्पनीले रामेछापको लिखु नदीमा निर्माण गरेको लिखु–४ आयोजना सम्पन्न भई सञ्चालनमा आइसकेको छ । आयोजनाले अहिले व्यापारिक विद्युत उत्पादन गरिरहेको छ । यो आयोजना ९ अर्ब ५४ करोड रुपैयाँ लागतमा सम्पन्न भएको हो ।
यस्तै, बलेफी हाइड्रोले पनि ३६ करोड ५५ लाख ९४ हजार रुपैयाँ बराबरको ३६ लाख ५५ हजार ९ सय ४० कित्ता साधारण सेयर निष्कासन गर्न अनुमति पाएको छ । कम्पनीले पहिलो चरणमा आयोजना प्रभावित क्षेत्रका स्थानीयबासी र दोस्रो चरणमा सर्वसाधारणका लागि सेयर निष्कासन गर्ने तयारी गरेको छ ।
कम्पनीले सर्वसाधारणका लागि जारी गर्न लागेको सेयर स्वपुँजी लगानीको २० प्रतिशत हो । कम्पनीको सेयर निष्कासन गर्न ग्लोबल आइएमई क्यापिटललाई बिक्री प्रबन्धक तोकिएको छ । कम्पनीले सिन्धुपाल्चोकमा निर्माण गरेको आयोजना निर्माण सम्पन्न भई अहिले परीक्षणको चरणमा छ ।
३० प्रतिशत स्वपुँजी र ७० प्रतिशत ऋण लगानी रहेको आयोजना ७ अर्ब रुपैयाँ लागतमा निर्माण सम्पन्न भएको छ ।
