ऊर्जा खबर
काठमाडौं । निशेधाज्ञा कुखुलो भएसँगै विद्युतको माग बढ्न सुरु गरेको छ । ७ हप्ताको कडाईपछि निशेधाज्ञा कुखुलो भई देशभर आर्थिक गतिविधि बढ्न थालेकाले विद्युतको माग पनि बढ्न सुरु गरेको हो ।
निशेधाज्ञा जारी राखेरै व्यापार व्यवसाय सञ्चालन गर्न अनुमति दिएपछि विद्युत खपत बढ्न थालेको नेपाल विद्युत प्राधिकरणका प्रवक्ता मदत तिम्सिनाले बताए । ‘निशेधाज्ञा अवधिमा १ हजार देखि साढे १२ सय मेगावाट हाराहारीमा विद्युतको उच्च माग देखिन्थ्यो,’ उनले ऊर्जा खबरसँग भने, ‘घटेको माग निशेधाज्ञा खुकुलो भएपछि फेरि बढ्न थालेको छ ।’
उनले मंगलबार विद्युतको उच्च माग बढेर १३६४ मेगावाट पुगेको बताए । यो उच्च माग अघिल्लो दिन सोमबारको भन्दा ३० मेगावाट बढी हो ।सोमबारको उच्च माग १३३४ मेगावाट रहेको थियो । आर्थिक गतिविधि बढ्दै गएमा विद्युत माग पनि विस्तारै बढेर जाने उनले बताए ।
त्यसको अघिल्लो दिन आइतबार र शनिबारको उच्च माग क्रमशः १२८८ र ११ सय ७६ मेगावाट रहेको पनि उनले बताए । शनिबारको तुलनामा आइतबारबाट नै विद्युतको उच्च माग बढ्न थालेको प्राधिकरणले जनाएको छ ।
यो वर्ष निशेधाज्ञा अवधिमा विद्युत माग सबैभन्दा कम ९ सय मेगावाटमा झरेको थियो । सामान्य अवस्थामा विद्युतको उच्च माग १५ सय मेगावाट हाराहारीमा पुगिसकेकोमा निशेधाज्ञा सुरु भएपछि घटेर ९ सय मेगावाटसम्म झरेको थियो ।
विद्युतको माग र आपूर्ति व्यवस्थापन मिलाउन विद्युत प्राधिकरणका जलविद्युतगृह पूर्ण क्षमतामा चलेका छन् । निजी क्षेत्रका जलविद्युतगृहले पनि पूर्ण क्षमतामा विद्युत उत्पादन गर्न थालेका छन् ।
मंगलबारको तथ्यांकअनुसार प्राधिकरणका जलविद्युतगृहको उत्पादन ४ सय मेगावाट छ । निजी क्षेत्रले ४४० मेगावाटको योगदान गरेको छ भने भारतबाट ५२४ मेगावाट विद्युत आयात भएको प्राधिकरणले जानकारी दिएको छ ।
बर्षासँगै नदी तथा खोलामा आएको बाढीले पुर्याएको क्षतिका कारण निजी क्षेत्रका केही जलविद्युतगृहको उत्पादन बन्द भए पनि सञ्चालनमा रहेका जलविद्युतगृहले पूर्ण क्षमतामा विद्युत उत्पादन गरिरहेका छन् ।
