ऊर्जा खबर
काठमाडौं । तेह्रथुममा निर्माण सम्पन्न ४.८ मेगावाटको खोरुङ्गा खोला जलविद्युत आयोजनाको परीक्षण भइरहेको छ । आयोजनाको विद्युत राष्ट्रिय प्रसारण प्रणालीमा जोड्नु अघि संरचनाको परीक्षण भइरहेको हो ।
आयोजनाको सबै संरचनाको परीक्षण भइरहेको रिलायवल हाइड्रो पावर कम्पनीका इन्जिनियर तथा आयोजना इन्चार्ज केशव पाण्डेले बताए । उनका अनुसार आयोजनामा जडान भएको हाइड्रो तथा इलेक्ट्रोमेकानिकल उपकरणको परीक्षण भइरहेको हो ।
‘संरचनाको अवस्था ठिक छ कि छैन भनेर परीक्षण गरिरहेका छौं,’ उनले ऊर्जा खबरसँग भने, ‘परीक्षण सकिएपछि आयोजनाबाट विद्युत उत्पादन सुरु हुन्छ ।’
उनले केही दिनमै परीक्षणको चरण पूरा गरेर विद्युत उत्पादनको तयारी गरिने बताए । आयोजनबाट २ सातासम्म परीक्षण उत्पादन गरेर नेपाल विद्युत प्राधिकरणलाई दिनेछ ।
आयोजना सञ्चालनमा आउँदा उत्पादन हुने विद्युत विद्युतगृहदेखि ४ किलोमिटर दुरीमा रहेको जिरी–खिम्ती सबस्टेसनमा जोडिनेछ । सबस्टेसनसम्मको आवश्यक प्रसारण लाइन कम्पनी आफैले निर्माण गरेको हो । लाइनमा ८७ वटा पोल खडा गरिएको छ ।
आयोजनामा ३ हजार ८ यि ५३ मिटर हेडरेस र ३ सय २३ मिटर लामो पेनस्टक पाइप निर्माण गरिएको छ । आयोजनाको विद्युतगृहमा २ वटा उत्पादन युनिट छन् । आयोजनाको विद्युत यसअघि नै प्रसारण प्रणालीमा जोड्ने योजना अनुसार काम गरिरहेकोमा विश्वव्यापी रुपमा फैलिएको कोरोना महामारीले गर्दा उत्पादन लम्बिएको पाण्डेले बताए ।
यस्तै, विभिन्न जिल्लामा निर्माण सम्पन्न भएका ४ जलविद्युत आयोजनाकाे पनि विद्युत राष्ट्रिय प्रसारण प्रणालीमा जाेडिन लागेकाे छ । सिन्धुपाल्चाेक, पाँचथर,संखुवासभा र नुवाकाेटमा निर्माण भएका यी आयोजनाकाे ५९ मेगावाट प्रसारण प्रणालीमा जाेडिन परीक्षण भइरहेको छ ।
३६ मेगावाटकाे माथिल्लाे बलेफी ‘ए’, ८ मेगावाटको माथिल्लो हेवा, १० मेगावाटको काबेली बी–१ क्यासकेड र ५ मेगावाटको तल्लाे तादी खोला जलविद्युत आयोजना निर्माण सम्पन्न भइ परीक्षण भइरहेको हाे ।
