ऊर्जा खबर
झापा । चालु आर्थिक वर्ष २०८२/८३ को पुस मसान्तसम्म पूर्वी नाका काँकरभिट्टाबाट ९ अर्ब ७७ करोड २ लाख ३२ हजार रुपैयाँको पेट्रोलियम पदार्थ आयात भएको छ । यस नाकाबाट पेट्रोल, डिजेल, एलपी ग्यास, एटिएफ, मट्टीतेल गरी उक्त मूल्य बराबरको बराबरको पेट्रोलियम पदार्थ भित्रिएको हो ।
मेची भन्सार कार्यालयका सूचना अधिकारी एवम् भन्सार अधिकृत ईश्वरकुमार हुमागाईंका अनुसार अघिल्लो आव २०८१/८२ को यही अवधिको तुलनामा ५१ करोड ५९ लाख ४३ हजार रुपैयाँ अर्थात् ५.६ प्रतिशतले पेट्रोलियम आयातमा वृद्धि भएको छ । आयात बढेसँगै पेट्रोलियम पदार्थबाट प्राप्त राजस्व ५.७० प्रतिशत अर्थात् २५ करोड ४२ लाख ४० हजार रुपैयाँले बढेको उनले जानकारी दिए ।
कार्यालयको तथ्याङ्कअनुसार चालु आवको ६ महिनामा पेट्रोलियम पदार्थ आयातबाट ४ अर्ब ७४ करोड ९४ लाख ३६ हजार रुपैयाँ राजस्व सङ्कलन भएको छ । ४ अर्ब ७२ करोड ६ लाख रुपैयाँ मूल्य पर्ने ५३ हजार १ सय ५२ किलोलिटर पेट्रोल आयात भएको थियो ।
यसैगरी, याे अवधिमा ३ अर्ब २२ करोड ६५ लाख रुपैयाँको ३३ हजार ७ सय ४४ किलोलिटर डिजेल आयात भएको छ । १ अर्ब २४ करोड ७ लाख रुपैयाँको १२ हजार ८ सय ११ मेट्रिक टन एलपी ग्यास, ३७ करोड ९४ लाख रुपैयाँको ४ हजार १ सय १२ किलोलिटर एटिएफ र ९ करोड ५ लाख रुपैयाँको ९ सय ६४ किलोलिटर मट्टितेल यही अवधिमा आयात भएको कार्यालयको तथ्याङ्कले देखाएको छ ।
.jpg)
