ऊर्जा खबर
काठमाडौं । सिंगटी हाइड्रो इनर्जी प्रालिको सेयर किन्न दुई दिनमा करिब ५ गुणा आवेदन परेको छ । कम्पनीले सर्वसाधारणका लागि आइतबारदेखि साधारण सेयर निष्कासन गरेकोमा सोमबार कार्यालय समयसम्म उक्त आवेदन परेको हो ।
कम्पनीका अनुसार सोमबार कार्यालय समयसम्म ८ लाख ७९ हजार आवेदकबाट १ अर्ब ३८ करोड रुपैयाँ संकलन भएको छ । जुन, ४.७५ गुणा बढी हो । आइतबार बिहान आवेदन खुलेको ३ घन्टामै कम्पनीका लागि चाहिने रकम संकलन भइसकेको थियो ।
आइतबार साँझसम्म २ लाख २७ हजार आवेदकबाट ३७ करोड २६ लाख रुपैयाँ संकलन भएको थियो । कम्पनीले सय रुपैयाँ अंकित मूल्यका २९ लाख कित्ता सेयर सर्वसाधारणलाई छुट्ट्याएको थियो । जसबाट २९ करोड रुपैयाँ प्राप्त गर्ने लक्ष्य छ । निष्कासित सेयरमध्ये ५८ हजार कित्ता अर्थात् २ प्रतिशत सेयर कम्पनीमा कार्यरत कर्मचारीका लागि सुरक्षित गरिएको छ ।
१ करोड ४५ लाख रुपैयाँ बराबरको १ लाख ४५ हजार कित्ता अर्थात् ५ प्रतिशत सेयर सामूहिक लगानी कोषका लागि छुटट्याइएको छ । बाँकी २६ करोड ९७ लाख रुपैयाँ बराबरको २६ लाख ९७ हजार कित्ता सेयर सर्वसाधारणका लागि खुल्ला गरिएको कम्पनीले जनाएको छ ।
सर्वसाधारणले न्यूनतम १० कित्तादेखि अधिकतम २ लाख कित्तासम्म आवेदन दिन पाउनेछन् । आवेदकले छिटोमा चैत्र १० गतेसम्म र ढिलोमा चैत्र २० गतेसम्म आवेदन दिन पाउनेछन् । कम्पनीले सेयर निष्कासन गरी बाँडफाँड गर्न मेगा क्यापिटललाई बिक्री प्रबन्धक तोकेको छ । कम्पनीले यसअघि पनि आयोजना प्रभावित स्थानीयका लागि छुट्याएको १४ करोड ५० लाख रुपैयाँ बराबरको १४ लाख ५० हजार कित्ता सेयर निष्कासन गरी बाडफाँड गरिसकेको छ । स्थानीयका लागि छुट्याइएको सेयरका लागि पनि मागभन्दा बढी आवेदन परेको थियो ।
कम्पनीले लगानी गरेको सिंगटी खोलाको निर्माण सम्पन्न भई परीक्षणसमेत सकिएको छ । १३२ केभी सिंगटी–लामोसाँघु प्रसारण लाइन पूरा भइनसकेकाले आयोजनाको विद्युत प्रणालीमा जोडिन सकेको छैन ।
प्रसारण लाइनको काम अन्तिम चरणमा पुगेकाले चालू आर्थिक वर्षभित्र आयोजनाबाट विद्युत उत्पादन सुरु हुँदैछ । आयोजना सञ्चालनमा आएपछि विद्युत बिक्रीबाट वार्षिक ७० करोड रुपैयाँ आम्दानी हुनेछ ।
