ऊर्जा खबर
काठमाडौं । नेपाल विद्युत प्राधिकरण विराटनगर वितरण केन्द्रले विद्युत महसुल तिर्न अटेर गर्ने ग्राहकको लाइन काटेर कारबाही गर्न थालेको छ । वितरण केन्द्रले ५ महिनादेखि विद्युत महसुल नतिरेका ग्राहकको धमाधम लाइन काटिरहेको हो ।
वितरण केन्द्रले ग्राहकबाट ४९ करोड १३ लाख ५४ हजार रुपैयाँ विद्युत महसुल उठाउन बाँकी छ । धेरै विद्युत बक्यौता उठ्न बाँकी देखिएपछि गत पुस २६ गतेबाट महसुल नतिर्ने ग्राहकको लाइन काट्ने अभियान सुरु भएको वितरण केन्द्र प्रमुख मिथिलेशकुमार गोहिवारले बताए ।
उनका अनुसार डेढ महिनाको अवधिमा अहिलेसम्म ३ सय ग्राहकको लाइन काटेर कारबाही गरिएको छ । घर कार्यालयको लाइन काटिएपछि ग्राहकले प्राधिकरण कार्यालयमा आएर विद्युतको बाँकी बक्यौता तिर्न थालेको पनि उनले बताए ।
‘५ महिनासम्म विद्युत महसुल नतिर्ने ग्राहकको संख्या बढ्दै गएपछि लाइन काटेर कारबाही गरिरहेका छौं,’ उनले ऊर्जा खबरसँग भने, ‘३ महिनासम्मको विद्युत बक्यौता बाँकी रहेका ग्राहकको पनि लाइन काटिन्छ ।’ उनले पछिल्लो डेढ महिनामा लाइन काटेर २ करोड ५ लाख रुपैयाँ विद्युत बक्यौता उठाएको बताए ।
यस्तै, वितरण केन्द्रले विद्युत चुहावट नियन्त्रण अभियानअन्तर्गत विद्युत चोरीमा संलग्न ३२ जनालाई पनि कारबाही गरेको छ । गत पुस २९ गतेबाट सुरु भएको अभियान अन्तर्गत हुकिङ गरेर विद्युत चोरी गर्ने ग्राहकबाट ११ लाख २२ हजार रुपैयाँ उठेको छ ।
कोरोना (कोभिड–१९) महामारीका कारण सुस्त बनेको लाइन काट्ने तथा चुहावट नियन्त्रण अभियान अब नियमितरूपमा चलाउने वितरण केन्द्रले जनाएको छ । यस क्षेत्रको वितरण लाइनको चुहावट ७.८ प्रतिशत छ । चालू आर्थिक वर्ष सकिँदा विद्युत चुहावट ७.३९ प्रतिशतमा झार्ने लक्ष्य छ । यस वितरण केन्द्रअन्तर्गत प्राधिकरणको विद्युत सेवा लिने ७३ हजार ग्राहक छन् ।
