ऊर्जा खबर
नेपालगञ्ज । बाँकेको नरैनापुर गाउँपालिकामा ७० करोड रुपैयाँ लगानी गरेर सौर्य विद्युत् आयोजना विकास गर्न एक भारतीय लगानीकर्ताले इच्छा व्यक्त गरेका छन् । गाउँपालिकामा नवीकरणीय ऊर्जा उत्पादनको सम्भावनाबारे चलाएको छलफलमा भारतीय लगानीकर्ताले यस्तो इच्छा देखाएको गाउँपालिका अध्यक्ष इश्तियाक अहमद शाहले बताए । ‘नवीकरणीय ऊर्जा उत्पादनको सम्भावनाबारे लगानीकर्तासँग छलफल भइरहे पनि हालसम्म निष्कर्षमा भने पुगेका छैनौँ,’ उनले भने ।
स्थानीय तहले एकीकृत रूपमा जग्गा उपयोग गरी नयाँ परियोजना कार्यान्वयनमार्फत आम्दानीको स्रोत बढाउने उद्देश्यले भारतीय लगानीकर्तासँग सहकार्य गर्न खोजिएको उनले बताए । नरैनापुर–२ र ४ मा जग्गाको व्यवस्थापन गर्न सकिने जनाउँदै अध्यक्ष शाहले लगानी गरेपछि त्यसको परिणाम आउने गरी काम गरिने जानकारी दिए ।
लुम्बिनी प्रदेशसभाका सांसद कृष्ण केसी, खजुरा गाउँपालिका–२ का वडाध्यक्ष धनराम ओली, सौर्य ऊर्जाका विज्ञ भरत विश्वकर्मालगायतको सहभागितामा भारतीय लगानीकर्तासँग नयाँ परियोजना कार्यान्वयनका सम्बन्धमा छलफल गरिएको उनको भनाइ छ ।
नरैनापुरसहित बाँकेलाई आधार बनाएर सोलार प्रणालीबाट सौर्य ऊर्जा उत्पादन गर्न करिब ७० करोड रुपैयाँ लगानी लाग्ने लाग्ने र लगानी गर्न आफू इच्छुक रहेको ती भारतीय लगानीकर्ता रोहनराज हेडजेले बताए ।
सरकारीस्तरबाट सहज रूपमा समन्वय भए निकट भविष्यमा नरैनापुरबाट सौर्य ऊर्जा उत्पादन गरी योगदान दिने उनको भनाइ छ । उक्त परियोजनामार्फत सुरुमा १० मेगावाटका दरले वार्षिक १ करोड ७६ लाख १० हजार युनिट बिजुली उत्पादन गरी सिधैँ ग्रिडमा जोड्ने योजना रहेको हेडजेले जानकारी दिए ।
नवीकरणीय ऊर्जा अनुदान नीति, २०७८ अनुसार व्यावसायिक प्रयोजनमा १ हजार ५०० पिकवाट क्षमताभन्दा बढी र घरायसी प्रयोजनमा ५०० पिकवाट क्षमताभन्दा बढीका सौर्य ऊर्जा प्रणाली जडान गर्न पाँचवर्षे मासिक किस्तामा बैंक ऋण पाइने सुविधा छ ।
यसरी ऋण लिँदा व्यावसायिक प्रयोजनमा ब्याजको ५० प्रतिशत र घरायसी प्रयोजनमा ब्याजको ७५ प्रतिशत रकम अनुदानस्वरूप बैंकमार्फत उपलब्ध गराउनुपर्ने प्रावधान छ ।
