ऊर्जा खबर
काठमाडौं । नुवाकोटको तादी खोलामा ४२ मेगावाट भन्दा बढी क्षमताका ७ जलविद्युत आयोजना निर्माणका विभिन्न चरणमा छन् । निजी क्षेत्रले अनुमतिपत्र लिएर स्वदेशी लगानीमा अघि बढाएका ३ मेगावाटदेखि ११ मेगावाटसम्मका आयोजना निर्माणाधीन, सञ्चालित र निर्माण सुरु गर्ने चरणमा छन् ।
विद्युत विकास विभागका अनुसार दुई आयाेजना (१० मेगावाट) सञ्चालनमा, ४ आयाेजना निर्माणाधीन (२४.५ मेगावाट) र ८ मेगावाटकाे एक आयाेजनाकाे अध्ययन भइरहेकाे छ ।
खाेलामा अघि बढेका आयाेजनामध्ये सबै भन्दा ठूलाे ११ मेगावाटकाे माथिल्लाे तादी छ । याे आयाेजना सुर्य कुण्ड हाइड्रो इलेक्ट्रीक लिमिटेडले निर्माण गरिरेहेकाे छ । कम्पनीले २०७२ असोज २२ गते अनुमतिपत्र लिएर राउतबेसीमा यो आयोजना निर्माण गरिरहेको हो । यो आयोजना निर्माणको अन्तिम चरणमा छ । यस्तै, ५.५ मेगावाटको मध्ये तादी दुप्चेश्वर महादेव हाइड्रो पावर लिमिटेडले निर्माण गरिरहेकाे छ । कम्पनीले आयोजना निर्माण गर्न २०७७ साउन २७ गते विभागबाट उत्पादन अनुमति पाएको थियो ।
हिरारत्न हाइड्रोपावर कम्पनीले २ जलविद्युत आयोजना निर्माण गरिरहेको छ । कम्पनीले ५ मेगावाटको तादी खोला र ३ मेगावाटको तादी खोला क्यासकेड जलविद्युत आयोजना निर्माण गरिरहेको हो । तादी खोलाबाट विद्युत उत्पादन भई बाहिर निस्कने पानीको उपयोग हुने गरी तादी खोला क्यासकेड निर्माण भइरहेको छ । कम्पनीले विभागबाट २०७६ बैशाख ३० गते अनुमतिपत्र लिएको थियो ।
यसैगरी, ८ मेगावाटको तादी घ्याम्फेदी जलविद्युत आयाेजनाकाे भने अध्ययन भइरहेकाे छ । एबीपि इनर्जी लिमिटेडले विभागबाट २०७७ असार ३० गते अध्ययन अनुमति लिई काम अघि बढाएकाे हाे । विभागका अनुसार कम्पनीले आयाेजनाकाे अध्ययनकाे काम २०८० असार २९ गतेभित्र सम्पन्न गर्नुपर्ने छ ।
खाेलामा पहिचान भएका आयाेजनामध्ये दुइ जलविद्युत आयाेजनाले १० मेगावाट विद्युत उत्पादन गरिरहेका छन् । आदीशक्ति पावर डेभलपमेन्ट कम्पनीले ५ मेगावाटको तादी खोला जलविद्युत आयोजना र बुध्दभूमी हाइड्रो पावर कम्पनीले ४.९९ मेगावाटको तल्लो तादी जलविद्युत आयोजना निर्माण सम्पन्न गरी विद्युत उत्पादन गरिरहेका छन् ।
तल्लाे तादीले २०७८ चैत १० र तादी खोलाले २०६९ चैत १५ गतेदेखि निरन्तर विद्युत उत्पादन गरिरहेका छन् ।
.jpg)
