ऊर्जा खबर
काठमाडौं । ७५० मेगावाटको पश्चिम सेती जलाशय जलविद्युत् आयोजना निर्माणको जिम्मा लिएको भारतीय कम्पनी एनएचपिसी लिमिटेडले लगानी बोर्ड समक्ष प्रारम्भिक प्रतिवेदन बुझाएको छ । कम्पनीले बोर्डसँग भएको समझदारीपत्र (एमओयू) अनुसार तोकिएको समयभित्रै प्रतिवेदन बुझाएको जनाइएको छ ।
बोर्ड र एनएचपिसी र बोर्डबीच गत भदौ २ गते एमओयू भएको थियो । समझदारी भएको मितिबाट लागू भएर २१ महिनाभित्र कम्पनीले विस्तृत आयोजना प्रतिवेदन (डिपिआर) बुझाउनुपर्ने छ ।
एमओयू अनुसार एनएचपिसीले दुई वर्षभित्र दुवै आयोजनाको आर्थिक, वित्तीय, प्राविधिक, सामाजिक एवम् वातावरणीय, ऊर्जा बजारको सुनिश्चितता, प्रसारण लाइन लगायत विषय अध्ययनको विस्तृत अध्ययन प्रतिवेदन बोर्डमा पेश गर्नुपर्ने उल्लेख छ । कम्पनीले दुवै आयोजनामा १ खर्ब ८० करोड भारु लगानी गर्ने जनाएको छ ।
पश्चिम सेती १७ वर्षसम्म अष्ट्रेलियन कम्पनी स्नोइ माउन्टेन इन्जिनियरिङ कर्पोरेशन (स्मेक) ले ओगटेपछि २०६८ साल साउन ११ गते तत्कालीन मन्त्रिपरिषद्ले खारेज गरेको थियो । स्मेकसँगको अनुमतिपत्र खारेज गरेर चिनियाँ थ्रि गोर्जेजको सहायक कम्पनी सिडब्लूई इन्भेष्टमेन्ट कर्पोरेशनलाई एमओयू गरी विकास गर्न दिइएको थियो । तर, काम गर्न नसकेपछि २०७५ सालमा चिनियाँ कम्पनीसँगको एमओयू खारेज गरिएको थियो ।
