ऊर्जा खबर
काठमाडौं । नेपालका निजी ऊर्जा उत्पादकहरूले २०० मेगावाटसम्मको बिजुली बेच्ने गरी भारतीय कम्पनीहरूसँग समझदारी गरेका छन् । मंगलबार (बैशाख ५ गते) सुरु भएको दुई दिने ऊर्जा सम्मेलन, २०२३ का क्रममा उक्त समझदारी गरिएको हो ।
समझदारी हुने आयोजनामा १०३.५ मेगावाटको चुवाखोला जलविद्युत आयोजना निर्माणकर्ता बिजबेल इनर्जी प्रालि र भारतको मानिकरण पावर, ८५ मेगावाटको कसुवाखोला निर्माणकर्ता कसुवाखोला हाइड्रो पावर लिमिटेड र मानिकरणसँग विद्युत व्यापार गर्न समझदारीपत्रमा हस्ताक्षर भएको छ । थप, विद्युत व्यापारका लागि संलग्न अर्को आयोजनाको भने नाम खुलाइएको छैन ।
विद्युत व्यापार गर्न निजी क्षेत्रलाई सरकारले अनुमति दिएको छैन तर सरकारलाई दबाब दिन र आगामी दिनमा निजी क्षेत्रमार्फत पनि विद्युत व्यापारको ढोका खुला गर्नका लागि यस खालको समझदारी गरिएको ऊर्जा सम्मेलनका संयोजक आशिष गर्गले ऊर्जा खबरलाई जानकारी दिए । भारतका विद्युत व्यापार कम्पनीहरू नेपालका निजी क्षेत्रसँग विद्युत खरिद गर्न इच्छुक रहेको निजी क्षेत्रले बताउँदै आएको छ ।
विद्युत व्यापारलाई फराकिलो बनाउने उद्देश्यले ऊर्जा सम्मेलनकै क्रममा स्टिल मिट र नेपालको पावर एक्सचेन्ज कम्पनी प्रालिबीच पनि समझदारी भएको छ । सम्मेलनको पहिलो सत्र प्रधानमन्त्री पुष्पकमल दाहालले उद्घाटन गरेका थिए ।
