ऊर्जा खबर
काठमाडौं । नेपाल विद्युत प्राधिकरणले विभिन्न तहमा कार्यरत ८ सय ४१ कर्मचारीको सरुवा गरेको छ । प्राधिकरणले कर्मचारी सेवा, शर्त विनियमावली २०७५ को विनियम ४३, ४६, ४८ र ५१ मा भएको व्यवस्था बमोजिम एकै पटकमा यति धेरै कर्मचारीको सरुवा गरेको हो ।
२०७७ चैत्र ३१ गतेको निर्णय अनुसार १ देखि ८ तह सम्मका कर्मचारीको सरुवा गरिएको प्राधिकरणले जनाएको छ । प्राधिकरणका अनुसार सरुवा हुनेमध्ये ५ सय ३२ कर्मचारी आफुले इच्छाएको प्रदेशमा सरुवा भएका हुन् ।
अन्य ३ सय ९ जना कर्मचारीको नियमित सरुवा गरी जिम्मेवारी तोकिएको हो । एउटै कार्यालयमा तोकिएको अवधि पूरा भएका तथा कार्य मूल्याङकनको आधारमा कार्यरत कर्मचारीको सरुवा गरिएकोे प्राधिकरणले जनाएको छ ।
यसपटक वितरण केन्द्र, प्रादेशिक कार्यालय, निर्देशनालय, आयोजना, प्रशासन शाखा, जलविद्युत केन्द्र, प्राविधिक सेवा विभागलगायतका कार्यालयका कर्मचारीको जिम्मेवारी हेरफेर गरेर सरुवा गरिएको छ । नियमित प्रक्रियाअनुसार सरुवा हुने ११ जना ८ तहका छन् ।
६८ जना ७ तहका, ३३ जना ६ तहका, ५४ जना ५ तहका र ६३ जना ४ तहका कर्मचारी छन् । ३९ जना ३ तहका, २७ जना २ तहका र १४ जना १ तहका कर्मचारीको जिम्मेवारी हेरफेर गरिएको छ । सरुवा भएका यी कर्मचारीको विभिन्न कार्यालय, आयोजना, जलविद्युत केन्द्रलगायतमा जिम्मेवारी तोकिएको छ ।
यस्तै, प्रदेश तहबाट नियुक्त भई अर्को प्रदेशमा आउनेमध्ये १ सय ३६ जना ५ तहमा कार्यरत कर्मचारी छन् । २ सय ९८ जना ४ तह र ९८ जना ३ तहका रहेको प्राधिकरणले जनाएको छ ।
