ऊर्जा खबर
बेइजिङ । चीनले नवीकरणीय ऊर्जा उत्पादकहरूबाट सिधै विद्युत खरिद गर्न ग्राहकहरूलाई प्रोत्साहन गर्ने भएको छ । प्रदुषण फैलाउने कोइला प्लान्टको विद्युतलाई नवीकरणीय ऊर्जाका स्रोतबाट उत्पादन भएको विद्युतले प्रतिस्थापन गर्न अन्तर प्रान्त स्तरसम्म ग्राहकलाई ऊर्जा उत्पादकबाट खरिद गर्न पाउने अवसर दिने भएको हो ।
सुरुवातमा ऊर्जा उत्पादकबाट सिधै विद्युत खरिद गर्ने र पहुँच बढ्दै गएपछि विस्तारै थोक उपभोक्ता र विद्युत बिक्रेताहरूलाई पनि जोड्दै लैजाने योजना रहेको अन्तर्राष्ट्रिय समाचार एजेन्सी रोयसर्टले जनाएको छ । रोयटर्सका अनुसार त्यहाँको राष्ट्रिय विकास और सुधार आयोग (एनडिआरसी) ले प्रान्तिय ग्रिड कर्पोरेशनलाई पठाएको जवाफमा अन्तर प्रान्त विद्युत व्यापार गर्न सकिने बताएको हो ।
प्रान्तिय ग्रिड कर्पोरेशनले अन्तर प्रान्त विद्युत व्यापारको मस्यौदा एनआरडिसीमा पेश गरेको थियो । चीन विश्वको सबैभन्दा बढी कार्बन उत्सर्जन गर्ने राष्ट्र हो । सन् २०३० सम्ममा कार्बन उत्सर्जन उच्च सीमामा पुग्ने देखिएकाले नवीकरणीय ऊर्जाको खपत बढाउन जोड दिँदै आएको छ ।
चीनले कूल जडित क्षमताको ६० प्रतिशत विद्युत कोइलामा आधारित थर्मल प्लान्टबाट उत्पादन गर्दै आएको छ । चीनको पश्चिमी क्षेत्रमा मात्रै नवीकरणीय ऊर्जाको उत्पादन बढी रहेकाले अन्तर प्रान्तिय विद्युत व्यापारलाई प्रोत्साहन गरिएको हो ।
सन् २०२० मा ५ खर्ब ५८ अर्ब ७५ करोड किलोवाट घन्टा अन्तर प्रान्तिय विद्युत व्यापार भएको थियो । यो चीनको कूल विद्युत व्यापारको १७.६ प्रतिशत रहेको एनडिआरसीले जनाएको छ । विश्वमै बढी कार्बन उत्सर्जन गर्ने चीनलाई नवीकरणीय ऊर्जाकाे उत्पादन बढाउन दबाव छ ।
काेइला अभावमा ऊर्जा संकट झेलेकाे चीनमा विद्युत अभावमा उद्याेगहरूकाे उत्पादन ४४ प्रतिशतसम्म कटाैती हुन पुगेकाे छ । उद्याेगकाे उत्पादन कम हुँदा यसकाे असर विश्व बजारमा परिरहेकाे छ ।
राेयटर्सबाट अनुवाद
