ऊर्जा खबर
काठमाडौं । बंगलादेशले भारतको उत्तर पूर्वी त्रिपुरा राज्यबाट १९२ मेगावाट विद्युत खरिद गर्ने भएको छ । बंगालादेशले विद्युतको आन्तरिक माग व्यवस्थापन गर्न त्रिपुरा स्टेट इलेक्ट्रिसिटी कर्पोरेश लिमिटेड (टिएसइसिएल) सँग थप विद्युत खरिद गर्ने भएको हो ।
बंगालादेशले यसअघि यो राज्यबाट १६० मेगावाट विद्युत खरिद गर्दै आएकोमा यो परिमाणलाई २० प्रतिशत बढाएर १९२ मेगावाट पुर्याएको अन्तर्राष्ट्रिय समाचार एजेन्सीहरूले जनाएका छन् । बंगालादेशले थप विद्युत खरिद गर्न त्रिपुरासँगको पुरानो सम्झौता ५ वर्षका लागि नवीकरण गरेको समाचारमा जनाइएको छ ।
बंगालादेशले पहिलो पटक त्रिपुरा राज्यसँग विद्युत खरिदका लागि सन् २०१० को जनवरीमा सम्झौता भएको थियो । यो सम्झौताको अवधि पूरा भएपछि थप विद्युत खरिद गर्ने गरी बंगालादेशले पुनः सम्झौता गरेको हो । यो सम्झौताको अवधि सन् २०२६ को मार्चमा सकिनेछ ।
बंगालादेशले सम्झौता भएको पहिलो वर्ष प्रतियुनिट ६.२७ भारु मा विद्युत खरिद गर्न पाउनेछ । अर्को वर्षदेखि वार्षिक २ प्रतिशत बढी मूल्य तिर्नुपर्नेछ । थप विद्युत खरिदका लागि सम्झौता भएसँगै बंगालादेशले भारतसँग अब कूल ११९२ मेगावाट विद्युत खरिद गर्नेछ ।
त्रिपुरा बाहेक भारतबाट बंगालादेशतर्फ पश्चिम बंगाल राज्यको भेरामारा सीमाबाट १ हजार मेगावाट निर्यात हुँदै आएको छ । अहिले बंगालादेशको विद्युत जडित क्षमता २१ हजार ४ सय ३५ मेगावाट छ ।
उत्पादन करिब २० हजार ९ सय ३४ मेगावाट हुँदै आएको छ । गत अप्रिल ३ मा अहिलेसम्मकै बढी १३ हजार १८ मेगावाट विद्युत खपत भएको समाचारमा जनाइएको छ । बंगालादेशले नेपालसँग विद्युत खरिद गर्न इच्छा देखाए पनि प्रसारण संरचनाकाे समस्याका कारण अहिलेसम्म पठाउन सकिएकाे छैन ।
अन्तर्राष्ट्रिय समाचार एजेन्सीहरूको सहयोगमा अनुवाद
