ऊर्जा खबर
काठमाडौं । नेपाल विद्युत प्राधिकरण भरतपुर वितरण केन्द्रले विद्युत मिटर रिडिङ कार्य बन्द गरेको छ । कोरोना महामारीको उच्च जोखिमका बेला ग्राहकको घर–घरमा पुग्न सम्भव नभएको भन्दै अनिश्चित कालका लागि मिटर रिडिङ कार्य बन्द गरेको हो ।
मिटर रिडिङमा खटिने कर्मचारीमा कोरोना संक्रमण हुने जोखिम उच्च भएपछि ग्राहकको घर–घरमा नपठाउने निर्णय भएको वितरण केन्द्र प्रमुख राजीव सिंहले बताए । ‘स्वास्थ्य सुरक्षालाई ध्यानमा राखी मिटर रिडिङ नगर्ने निर्णय भएको छ,’ उनले भने, ‘निशेधाज्ञा अवधिभर प्राधिकरणले ग्राहकको घर–घर पुगेर विद्युतको बिल दिने छैन ।’
उनले मिटर रिडिङ नहुँदा जेठ महिनाको विद्युत महसुल अघिल्लो महिनामा खपत भएको युनिटका आधारमा असुल गरिने बताए । उनले अघिल्लो महिनाको खपत युनिट बराबर विद्युत महसुलको बिलको विवरण ग्राहकलाई पठाइसकेकाले जेठ महिनामा सोही आधारमा भुक्तानी गरिदिन आग्रह समेत गरेका छन् ।
थ्रीफेज, टिओडी र औद्योगिक ग्राहकको हकमा भने मिटर रिडिङ कार्य यथावत रहने छ । वितरण केन्द्रले काउन्टरमै आएर विद्युत महसुल भुक्तानी गर्दा संक्रमणको जोखिम उच्च रहेको भन्दै अनलाइन प्रविधिबाट भुक्तानी गर्न ग्राहक वर्गमा अनुराेध गरेको छ ।
महसुल काउन्टर सातामा ३ दिन खुल्ने
वितरण केन्द्रले साताको ३ दिन विद्युत महसुल काउन्टर खुलाउने भएको छ । निशेधाज्ञापछि बन्द रहेको काउन्टर ग्राहकको सुविधाका लागि खुलाउने निर्णय भएको हो ।
साताको आइतरबार, मंगलबार र बिहीबार विद्युत महसुल काउन्टर खुल्ने छन् । जिल्लामा साताको ३ दिन बिहान १० देखि १ बजेसम्म बैंकहरू खुल्ला हुने हुँदा वितरण केन्द्रको महसुल काउन्टर बिहान ८ देखि १२ बजेसम्म खुल्ला गरिने छ ।
