ऊर्जा खबर
काठमाडौं । बागमती प्रदेशमा कार्यरत नेपाल विद्युत प्राधिकरणका ४२ कर्मचारी कोरोना (कोभिड–१९) संक्रमित भएका छन् । प्रदेशका विभिन्न जिल्लामा कार्यरत कर्मचारीमा संक्रमण देखिएको हो ।
कोरोनाको लक्षण देखिएपछि परीक्षण गर्दा संक्रमण पुष्टी भएको प्राधिकरण काठमाडौं प्रदेशिक कार्यालयका प्रमुख श्रीराम पाण्डेले बताए । ‘विद्युत अत्यावश्यक सेवा भएकाले हाम्रा कर्मचारी साथीहरू निशेधाज्ञामा पनि काममा खटिनु भएको छ,’ उनले ऊर्जा खबरसँग भने, ‘काममा खटिएका बेला उहाँहरूमा कोरानाको संक्रमण देखिएको छ ।’
उनले संक्रमण पुष्टी भएका सबै कर्मचारीमा सामान्य लक्षणबाहेक गम्भिर समस्या नदेखिएको बताए । संक्रमण पुष्टी भएका कर्मचारी अहिले आफ्नै घरमा आइसोलेसनमा बसेका छन् ।
पछिल्लो समय कोरोना संक्रमण बढिरहेका बेला प्राधिकरण कर्मचारी पनि संक्रमित हुन पुगेको पाण्डेले बताए । संक्रमण भएकामध्ये धेरैको स्वास्थ्यमा क्रमिश सुधार भइरहेको छ । उनीहरूलाई पूर्ण स्वास्थ्य लाभ भएपछि मात्रै काममा फर्काइने प्राधिकरणले जनाएको छ ।
गत वर्षभन्दा यो वर्ष प्राधिकरण कर्मचारी संक्रमण हुने दर बढेको छ । देशभर नै संक्रमित हुनेको संख्या तीव्र गतिमा बढिरहेकाले प्राधिकरण कर्मचारी संक्रमित हुने दर पनि बढेको हो ।
विद्युत महसुल संकलन काउन्टर, नो लाइट, मर्मत तथा संभार, ग्रिड तथा वितरण सबस्टेसन, जलविद्युतगृहमा खटिने कर्मचारीमा संक्रमणको उच्च जोखिम छ । विद्युत अत्यावश्यक सेवा भएकाले सुरक्षा नियमको पालना गर्दै प्राधिकरण कर्मचारीलाई काममा खटिनु पर्ने बाध्यता छ ।
