ऊर्जा खबर
काठमाडौं । म्याग्दीको पश्चिम क्षेत्रमा विद्युतीकरण गर्नका लागि निर्माण गरिएको प्रसारण लाइन र सबस्टेसनको परीक्षण सुरु भएको छ । नेपाल विद्युत् प्राधिकरण आयोजना व्यवस्थापन निर्देशनालयअन्तर्गत वितरण प्रणाली सुदृढीकरण तथा विस्तार आयोजनामार्फत निर्माण गरिएको सबस्टेसन र लाइनको परीक्षण सुरु भएको हो ।
पर्वतको जलजला गाउँपालिकाको वडा नम्बर ४ मोहनचोक सबस्टेसनबाट म्याग्दीकाे मालिका गाउँपालिका वडा नम्बर ६ मा रहेको रातोढुङ्गासम्म लाइन निर्माण गरिएकाे छ । साथै, ३३/११ केभीको रातोढुङ्गा सबस्टेसन निर्माण भएको भएको छ ।
लाइन र सबस्टेसनको निर्माण पूरा गरी बिहीबार (मंसिर २८ गते) देखि चार्ज गरिएको ठेकेदार त्रिपुरेश्वर-जयदुर्गे जेभीका निर्देशक पद्मसागर लुइँटेलले बताए । उनले प्रसारण लाइनको पोल गाड्ने, तार तान्ने, सबस्टेसनमा संरचना निर्माण र उपकरण जडानको काम सकिएर परीक्षण सुरु भएको जानकारी दिए ।
प्राधिकरणको प्राविधिक टोलीले परीक्षण गरिरहेका छन् । परीक्षण पूरा गरेर एक सातापछि सञ्चालन गर्ने योजना रहेको पनि लुइँटेलले बताए ।
लाइन र सबस्टेसनको काम यसअघि नै सम्पन्न गर्ने योजना भएपनि सुरुवाती चरणमा जग्गा अधिग्रहणमा भएको ढिलाइका कारण काम प्रभावित भएको जनाइएको छ । पोल गाड्ने र तार तान्ने क्रममा जग्गाधनीको अवरोधले रोकिएका थिए ।
निर्माणमा भएको ढिलाइले म्याग्दीका पश्चिमी क्षेत्रमा पर्ने मङ्गला, मालिका र धवलागिरि गाउँपालिकामा केन्द्रीय प्रसारण लाइन विस्तार र विद्युत् आपूर्ति प्रभावित भएको म्याग्दी वितरण केन्द्रले जनाएको छ ।
केन्द्र अन्तर्गत अहिले विद्युतीकरणको काम तिव्र गतिमा भइरहेको छ । यो वर्ष सबै क्षेत्रमा राष्ट्रिय ग्रिडको बिजुली पुर्याउने गरी काम भइरहेको केन्द्रले जानकारी दिएको छ । केन्द्र अन्तर्गत अहिले २१ हजार १३० ग्राहक छन् ।
वितरण प्रणाली सुदृढीकरण तथा विस्तार आयोजना अन्तर्गत १२ वटा वितरण सबस्टेसन निर्माण गर्नुपर्नेमा १० वटा सञ्चालनमा आइसकेकाे लुइटेलले बताए । रातोढुङ्गा ११औं सबस्टेसन हाे । बाँकी घ्याम्पेताल सबस्टेसनकाे काम पनि अन्तिम चरणमा पुगेकाे छ । उक्त सबस्टेसन पनि एक महिनाभित्र सञ्चालनमा आउने जनाइएकाे छ ।
