ऊर्जा खबर
काठमाडौं । सिराहाको ३३ केभीए लहान सबस्टेसनमा चट्याङ परेर क्षति पुर्याउँदा करिब डेढ लाख घरधुरीको विद्युत आपूर्ति बन्द भएको छ । सोमबार रातिदेखि आएको भारी वर्षासँगैको हावाहुरी र चट्याङले मंगलबार बिहान सबस्टेसनमा क्षति पुर्याउँदा आपूर्ति बन्द भएको हो ।
सबस्टेसनको ३३ केभी लाइनको बसबार, पिटी, तारलगायतमा ठुलो क्षति पुर्याएको नेपाल विद्युत प्राधिकरण लहान वितरण केन्द्र प्रमुख जितेन्द्र यादवले बताए । उनका अनुसार ढल्केबर ग्रिड अन्तर्गतको सबस्टेसनमा क्षति पुग्दा सिराहा वितरण केन्द्र र लहान वितरण केन्द्र अन्तर्गका सम्पूर्ण क्षेत्र र गाइघाट क्षेत्रको बस्ती अन्धकार भइ जनजीवनमा प्रत्यक्ष प्रभाव परेको छ ।
सबस्टेसनबाट निस्किएको लहान, बस्तीपुर, थाडी, सितापुर र जहदी फिडरको आपूर्ति बन्द छ । आपूर्ति बन्द हुँदा लहान वितरण केन्द्र अन्तर्गतको ६५ हजार, सिराहा वितरण केन्द्रको ४० हजार र गाइघाट क्षेत्रको करिब ३५ हजार ग्राहकमा प्रत्यक्ष प्रभाव परेको छ ।
सबस्टेसनमा समस्या आउँदा प्राधिकरणलाइ ठुलो क्षति पुगेको यावदले बताए । ‘लहानले प्रतिदिन करिब २ लाख युनिट र सिराहाले करिब डेढ लाख युनिट विद्युत खपत गर्दै आएको छ’, उनले भने, ‘सबस्टेसनमा क्षति पुग्दा सो विद्युत खेर गइरहेको छ ।’ सबस्टेसन मर्मतको काम भइरहेको छ । आज साँझसम्म मर्मतसंभारको काम सम्पन्न गरेर आपूर्ति सुचारु गर्ने योजनाका साथ काम भइरहेको केन्द्रले जनाएको छ ।
