ऊर्जा खबर
काठमाडौं । काठमाडौं । चिसो कम हुँदै गएपछि देशभरको विद्युतको उच्च माग पनि घट्न थालेको छ । मध्य मंसिरबाट उकालो लागेको विद्युतको उच्च माग माघ अन्तिम साताबाट क्रमशः घट्न थालेको हो ।
जाडो कम हुँदै गएकाले विद्युतीय उपकरणको उपयोग कम हुन थालेपछि बिहान र साँझको विद्युतको उच्च माग पनि घटिरहेको नेपाल विद्युत प्राधिकरणले जनाएको छ । प्राधिकरणका अनुसार यो वर्ष उच्च माग १४ सय ७५ मेगावाटसम्म पुगेकोमा शनिबार १२ सय ५२ मेगावाटमा झरेको छ । शुक्रबारकाे उच्च माग १३ सय १२ मेगावाट थियाे । बिहीबारको माग १३ सय ८८ मेगावाट थियाे ।
चिसो कम भई एसी, हिटरलगायत विद्युतीय उपकरण चलाउने क्रम विस्तारै घट्दै गएकाले खपत पनि घटिरहेको प्राधिकरणले स्पष्ट पारेको छ । विद्युतीय उपकरण नचल्दा अहिले २ सय मेगावाटभन्दा बढी माग घटिसकेको छ ।
यो वर्ष गत माघ २१ गते सबैभन्दा बढी १४ सय ७५ मेगावाट विद्युत खपत भएको छ । त्यस यताको उच्च माग भने क्रमशः घट्दै गएको छ । शनिबारको माग माघ २१ गतेकोभन्दा २ सय २३ मेगावाट कम हो ।
विद्युत खपत क्रमशः घट्न थाले पनि भारतबाट हुने विद्युत आयात परिमाण भने बढेको छ । नदी खोलामा पानीको सहत कम भई विद्युत उत्पादन घटेकाले आयात बढेको हो । प्राधिकरणले पुस यता मात्रै करिब २ अर्ब ७५ करोड रुपैयाँको विद्युत भारतका विभिन्न विन्दुबाट आयात गरेको छ । प्राधिकरणले यो वर्ष सबैभन्दा बढी गत माघ १६ गते भारतबाट ७ सय १५ मेगावाट विद्युत आयात गरेको थियो ।
अहिले प्राधिकरणको उत्पादन ४ सय ८० मेगावाटमा झरेको छ । प्राधिकरणले माग र आपूर्ति व्यवस्थापन गर्न आवश्यकताअनुसार कुलेखानी जलाशय २४ घन्टा सञ्चालन गरिरहेको छ । अर्ध जलाशय जलविद्युतगृह पनि बिहान र साँझको समयमा पूर्ण क्षमतामा चलाएको छ ।
निजी क्षेत्रको उत्पादन घटेर २ सय ३३ मेगावाटमा झरेको छ । हिउँदमा आन्तरिक उत्पादन घट्नु तथा २ सय मेगावाट हाराहारीमा विद्युतको माग घढ्नुले भारतमाथिको निर्भरतालाई बढाएको छ ।
.jpg)