ऊर्जा खबर
कपिलवस्तु । उर्जा, जलस्रोत तथा सिँचाइ मन्त्रालयको सक्रियतामा कपिलवस्तु जिल्लाको महाराजगञ्ज नगरपालिका–१० हरदौनास्थित बाणगङ्गा नदीको तटबन्धन कार्यक्रम शुरू भएको छ ।
गत असार दोस्रो साता बाणगङ्गा नदीमा आएको बाढीले वस्तीमा क्षति पुगेपछि कपिलवस्तुका संघीय सांसद सुरेन्द्रराज आचार्यलगायतको टोली बस्ती जोगाउन माग गर्दै उmर्जा, जलस्रोत तथा सिँचाइ मन्त्रालयमा पुगेको थियो ।
नदी वरपरको वस्तीमा क्षति पुगेपछि मन्त्री दीपक खड्काले नदी वरपर तत्काल तटबन्धनको काम अगाडि बढाउन जनताको तटबन्धन कार्यक्रम फिल्ड कार्यालय नम्बर ५ बुटवल रुपन्देहीलाई निर्देशन दिएका थिए ।
मन्त्री खड्काको निर्देशनसँगै तटबन्धनको काम शुरू भएको हो । कार्यालयका प्रमुख, सिनियर डिभिजनल इन्जिनियर शम्भुराज पण्डितले हालसम्म १०० मिटर तटबन्धन भइसकेको जानकारी दिए । बाढीले दुई घर विस्थापित हुनुका साथै २५ घर जोखिममा परेका थिए भने ३ रोपनी जमिन बगाएको थियो ।
‘कार्यालयमा नदी तटबन्धनको लागि आकस्मिक बजेट नभएपछि आवश्यक रकम मागका लागि विभाग र मन्त्रालयमा पठाएका थियौँ,’ कार्यालय प्रमुख पण्डितले भने, ‘ मन्त्रालयकै निर्देशनमा उक्त कामलाई अगाडि बढाएका हौँ ।’
कुल १७० मिटर तटबन्धन गर्नुपर्नेमा हालसम्म १०० मिटरमा तटबन्धनको काम सकिएको छ । २४ लाख लागतमा तटबन्धनको काम सम्पन्न हुन लागेको हो ।
