ऊर्जा खबर
काठमाडौं । नवलपरासीको बोझापोखरीको सबस्टेसन निर्माण सुरु भएको ७ वर्षमा पूरा भएको छ । नवलपुरको पहाडी क्षेत्र बौदीकाली, बुलिङटारसहित हुप्सेकोट क्षेत्रमा विद्युतीकरण गर्ने गरी २०७३ सालदेखि निर्माण सुरु भएको सबस्टेसनको काम सम्पन्न भएको हो ।
निर्माण सुरु गर्ने बेला तीन वर्षभित्र सम्पन्न गर्ने भनिएपनि विविध कारणले गर्दा थप ४ वर्ष लागेको नेपाल विद्युत प्राधिकरणले जनाएको छ । प्राधिकरणका अनुसार पहिलो सम्झौताअनुसार २०७५ सालभित्र निर्माण सम्पन्न गर्नुपर्ने थियो तर विविध कारणले पटकपटक म्याद थप गर्दै पहिलो सम्झौता अवधिको करिब चार वर्षपछि सम्पन्न भएको हो ।
ठेकेदारले काम नगर्दा लामो समयदेखि अलपत्र सबस्टेसनकाे काम सकिएसँगै जुल्लाको पहाडी क्षेत्रमा विद्युतीकरणको बाटो खुलेको छ । तनहुँतर्फबाट लाइन तानेर केही क्षेत्रमा विद्युतीकरण गरिएको छ । कतिपय स्थानमा लघु जलविद्यतबाट विद्युतीकरण गरिएको भए पनि मागअनुसार आपूर्ति हुन सकेको छैन ।
अहिले सबस्टेसनको चार्ज गर्ने काम भइरहेको प्राधिकरणले जनाएको छ । पुस १४ गतेदेखि नवलपुरको प्रगतिनगरबाट बिजुली प्रवाह गरी लाइन चार्ज गर्ने र सबस्टेसन चार्ज गर्ने काम सुरु भएको छ । यसलगत्तै ११ हजार केभीको लाइन चार्ज गरी स्थानीयस्तरमा वितरणको काम सुरु हुनेछ ।
आयोजनामार्फत पोखरीबाट डेढगाउँ जाने बाटोको धौबादीसम्म र बुलिङटारको केही क्षेत्रसम्म ११ केभीको लाइनसमेत वितरण हुनेछ । त्यसका लागि पोल गाड्ने र तार टाँग्ने काम सकिएको छ ।
बोझापोखरी क्षेत्रमा भने केही दिनमा दुईवटा ट्रान्सफर्मर जडान गरी बत्ती बाल्ने तयारी गरिएको प्राधिकरणले जनाएको छ । सबस्टेसन निर्माणको काम अलपत्र पर्दा लामो समयदेखि अन्धकारमा बस्न बाध्य पहाडी क्षेत्रका बासिन्दा अब भने उज्यालोमा बस्न पाउने भएका छन् ।
