उदिपुर-मार्कीचोक-भरतपुर प्रसारण लाइन ५० प्रतिशत पूरा, पालुङटारमा स्थानीय अवरोध

काठमाडौं । निर्माणाधीन २२० केभी उदिपुर–मार्कीचोक–भरतपुर प्रसारण लाइन आयोजना ५० प्रतिशत पूरा भएको छ । लमजुङको उदिपुरदेखि चितवनको भरतपुरसम्म पर्ने ६७ किलोमिटर लामो प्रसारण लाइनको आधा काम सकिएको हो ।

प्रसारण लाइनको १ सय ९२ मध्ये ३० वटाको जग हालेर सकिएको आयोजना प्रमुख चिरन्तनबिक्रम राणाले बताए । ‘प्रसारण लाइनको आधा जति काम सकियो,’ उनले ऊर्जा खबरसँग भने, ‘६ किलोमिटर प्रसारण लाइनको टावर ठड्याउँदैछौं ।’ 

उनले अहिले दोर्दी कोरिडोरमा निर्माणाधीन ४ जलविद्युत आयोजनाको विद्युत प्रवाह गर्ने गरी प्रसारण लाइनको ६ किलोमिटर खण्डमा १७ वटा टावर खडा गर्नुपर्नेमा १० वटाको काम सम्पन्न भइसकेको बताए । दोर्दी कोरिडोरका आयोजनाको विद्युत किर्तीपुर सबस्टेसन हुँदै यही लाइनमार्फत मध्यमस्र्याङ्दी जलविद्युत केन्द्रको स्वीचयार्डमा लगेर जोडिनेछ ।

दोर्दी कोरिडोरमा जेठभित्रै सम्पन्न हुने गरी १० किलोमिटर लामो १३२ केभी प्रसारण लाइन पनि निर्माणाधीन छ । दोर्दी कोरिडोरका आयोजनाको विद्युत खेर जान अवस्था आउन लागेकाले अहिले प्रसारण लाइनको यो खण्डलाई विशेष प्राथमिकता दिएर निर्माण गरिरहेको पनि उनले बताए । चैतभित्र सबै ठावर खडा गरेर तार तान्न सुरु गरिनेछ । जेठभित्र प्रसारण लाइनको ६ किलोमिटर खण्ड पूरा गरिसक्ने उनको दाबी छ ।

चिनको पिङ्गाओ कम्पनीले प्रसारण लाइनको काम गरिरहेको छ । अबको ९ महिनाभित्र प्रसारण लाइनको सबै काम सम्पन्न गरिसक्ने लक्ष्य छ । प्रसारण लाइनको प्रगति अझै बढी हुनुपर्ने भए पनि कोरोना महामारीका निर्माण प्रभावित हुँदा असर परेको राणाले बताए ।

प्रसारण लाइनको रुट पर्ने गोरखाको पालुङटारमा स्थानीय अवरोध छ । पालुङटारको बाह्रफिर्के, छापथ्रोक घुम्ती र धारापानीमा स्थानीयबासीले प्रसारण लाइनको रुट लैजाने नदिने भन्दै अवरोध गरेका छन् ।

‘स्थानीयले रुट बदल्नु भन्दै विरोध गर्छन् । हामीले छलफल र परामर्शबाट समस्याको समाधान गर्ने प्रयार गरिरहेका छौं । केही ठाउँको समस्या समाधान भयो । केही ठाउँमा अझै बाँकी छ । असारभित्र समाधान हुन्छ भन्ने अपेक्षा छ’ उनले भने ।

प्रसारण लाइन अन्तर्गत उदिपुर र भरतपुरमा २ वटा सबस्टेसन निर्माण भइरहेका छन् । प्रसारण लाइन र सबस्टेसन निर्माण सम्पन्न गर्न २ अर्ब ६० करोड रुपैयाँ खर्च हुने अनुमान छ ।